Зубайдат Шябанова
«УвутIан узу улихьди жаргъурза!», «Узухъ хъуркьидарва!», «Фукьан маракьлу талитар вуда!» – кIури гъахьну сар-сариз республикайин махлукьатлу жаргъбарин талитнаъ айидари. Думу талитар 1-пи июнди Табасаран райондин Хючна гъулаъ «Учу экстремизмдиз къаршу вуча! Учу спорт ктабгъурача!» лишниккди кIули гъушну.
Спортдин талитар Дагъустан Республикайин мялимарин ассоциацияйи «Ухьу сатIиди вуйиган, магълуб шулдар» проектдин дахилнаъди гъухдар ву. Талитар тешкил апIуз Табасаран райондин администрацияйи кюмек гъапIну.
ПучIу атлетикайин кросс ачмиш апIури, «Дагъустан Республикайин мялимарин ассоциация» РОО-йин кIулиъ айи, Республикайин образованиейин центрин директор Анжела Байрамбеговайи къайд гъапIганси, жаргъбан талитариъ иштирак хьуз республикайин саки вари шагьрариан ва районариан мялимар ва мектебариъ урхурайи баяр-шубар гъафну. Дурарин жергейиъ Табасаран райондин образованиейин идарйирин гъарашугъарра а. Му талитар тешкил апIбан метлеб, спортдихьна ва сагъламвалихьна ихь аьшкь улупбахъди сабси, аргъаж шулайи наслиз ва жигьилариз экстремизмдиз ва терроризмдиз ихь къаршувал улупуб ву.
Тешкилатчйири, варитIан асасуб иштирак хьуб ву, кIури гъахьнушра, талитариъ 15 кас йишварин дипломариинди ва грамотйириинди лишанлу гъапIну. Дурарикан 3 кас – сабпи, 5 кас – кьюбпи ва 7 кас – шубубпи йишварин сагьибар гъахьну.
«Талитарин кьяляхъ ич сюгьбатнаъ Табасаран райондин иштиракчйирин куратор, райондин гимназияйин директорин тербияйин ляхниан заместитель ва урус чIалнанна литературайин мялим Гьаваханум Байрамялиевайи къайд гъапIганси, талитар, Республикайин мялимарин ассациацияйин дахилнаъ айи жюрбежюр шагьрарин ва районарин 50-рихьна вакиларин, мектебариъ урхурайи баяр-шубарин иштираквал ади, лап маракьлуди кIули гъушну.
«Талитариъ вари йишвар мектебариъ урхурайи баяр-шубари гъадагъну. Хъа сабпи йишван сагьибар Табасаран райондин гимназияйин ученикар гъахьну. Дурар Аьлиасгьаб Небиев, Рустам Рашидов –кьюридра 8-пи классдиъ урхурайидар, ва 9-пи классдиъ урхурайи Муслим Ибрагьимов ву.
Думу йигъан ригъ алди манишин гизаф айивализ дилигди, марафондиъ иштирак хьуз ккунидарин кьадар аьхюб гъабхьнийи. Серенжемдикан вари разиди гъузну», – гъапнийи Гьаваханум Байрамялиевайи.
