7-пи майди Москвайиъ Кремлийин Андреевский залиъ Урусатдин Президент Владимир Путин цIийи кIул’ан уьлкейин президентдин гъуллугъниина гъюбан серенжем кIули гъубшну. Серенжемдиъ Урусатдин Президентди инаугурацияйиз хусуси метлеб ади гьязур дапIнайи Конституцияйин дафтриин хил иливну, Асас къанундин 82-пи маддайиъ айи урус чIалнан 33 гафнакан ибарат вуйи текст гъурхну. Думу гафарин асас мяна гьамциб ву: «Урусатдин Федерацияйин президентдин ихтиярар кIулиз адагъури, инсандин ва ватандашдин гьюрмат, ихтиярар ва азадвал уьбхюз, Урусатдин Федерацияйин Конституция тамам апIуз, суверенитет ва асиллу дарувал, хатIасузвал ва уьлкейин сабвал уьбхюз, халкьдиз вафалуди гъуллугъ апIуз ху апIураза».
Президентди хил дивну ху апIру Конституцияйин жилдар уьру ранг йивнайи варандин гъидкьикан дапIна. Думу Конституция президентдин администрацияйин библиотекайиъ уьбхюра ва инаугурацияйизтIан ишлетмиш апIурадар.
Гьамус Владимир Путин 5-пи ражари Президентвалин гъуллугъниина дуфна. Дугъаз 2030-пи йисан 7-пи майдизкьан гьюкуматдин кIулиъ хьуз ихтияр а.
Инаугурацияйин кьяляхъ Владимир Путин уьлкейин ватандашарихьна илтIикIну. Дугъу Урусатдин вари регионарин агьалйириз чухсагъул мялум гъапIну. «Ватан бадали женг гъабхурайи ихь игитариз, хусуси метлеб айи операцияйин иштиракчйириз икрам апIураза. Гележегдиъра Урусатдин халкьарин хатIасузвал варитIан заанди бисидиза. Вари уьлкйирихъди айи аьлакьйир мюгькам апIуз гьязур вухьа», – къайд гъапIну уьлкейин Президентди.
«Ухьу Урусатдин кьувват мюгькам апIру наслар тербияламиш дапIну ккунду. Уьлкейиъ аьсрариинди гъузнайи эдебнан кьиматлувалар ва аьдатар уьрхидихьа. Гъи ухьу умуд кади гележегдиз лигурахьа, цIийи проектар ва программйир уьмриз кечирмиш апIурахьа. Ухьу саб вуйи аьхю халкь вухьа, фицдар читинвалариан вушра удучIвидихьа, фунуб ляхинра уьмриз кечирмиш апIидихьа, сатIиди гъалиб хьидихьа»,
– гъапнийи чан улхбаъ Владимир Путинди.
Владимир Путин цIийикIултIан уьлкейиъ варитIан жавабдар гъуллугъниина гъювалихъди тебрик апIури, редакцияйин коллективди дугъаз гьюкумат имбубсана кьувватлу ва кьудратлу апIуз, уьлкейин хайир даккни душмнарихъди женг гъабхуз, агьалйирин гъуллугънаъ хьуз мюгькам сагъ’вал ккун апIура.
