Наргиз Гюлечова
1999-пи йисан 7-пи августди Чечен Республикайин терефнаанди террористар Дагъустандин ЦIумада ва БутIлих районариин алархьнийи. Гьадму гьядисйир духьну, цци 25 йис тамам дубхьна. Гьаддихъди аьлакьалу вуди 7-пи августди Дагъустандин военный комиссариатдин агьалйир призывдиз гьязур апIбан ва гьаъбан отделин кIулиъ айирин заместитель Явнус Жамбалаев Дагъустандин милли газатарин журналистарихъди гюрюшмиш гъахьну.
Къайд апIуб лазим вуки, Явнус Жамбалаев Афгъанистандин, Таджикистандин, гьацира 1999-пи йисан Дагъустандиъ гъахьи гьядисйирин иштиракчи ву, дугъу хусуси метлеб айи дявдин операцияйиъра иштирак’вал гъапIну.
Пресс-конференция ккебгъри, Жамбалаевди, учв му гьядисйириъ фици иштирак гъахьир вуш, ктибтну. 1999-пи йисан Урусатдин оборонайин министерствойин дахилнаъ айи Санкт-Петербургдиъ Михайловдин ччвурнахъ хъайи эскервалинна артиллерияйин академия ккудубкIбалан кьяляхъ, офицер хабарсузди Дагъустандиз алдахъну.
«Дагъустандиз дуфну айириз махлукьатлу хабрариан республикайин районариин террористар алархьну кIури гъеебхьунзуз. ИкибаштIан, айи аьгьвалатнакан хабар гъабхьи узхьан ккебехъну гъузуз гъабхьундарзухьан. Гьадмуган ихь республикайин агьалйири чпин хушниинди му яракьлу гьядисйириъ иштирак хьуз ккундайивал улупнийи, ва дицдар касарикан вари миллетарикан ибарат вуйи дивизия уч гъапIнийи.
Йиз фикриан, сарихьан тмунурихьна тарагъурайи мялуматарин кюмекниинди гьадму дивизия тешкил апIували вари Дагъустан террористариз къаршуди гъудужвнайивал ашкар гъапIну. Гьаддихъди сабси, йиз фикриан, 1999-пи йисан Дагъустандин аьтрафариин гъачагъар алархьувалин себебарикан саб, гьамушваъ гьадрариз ккилигурайи, гьадрарин терефар уьрхюрайи касар ади хьувал вуйи», – гъапну Явнус Жамбалаевди.
«7-пи августди Чечен Республикайин Ведено гъул’ан ухь’ин алархьуз гъафидарин кьадар цIиб дайи. Гьадмуган Урусатдин Правительствойин председатель вуйи Сергей Степашинди Дагъустан ккадабхъура пували республикайиин, алархьу террористарик разивалин «хлинццар» киршуз гъитнийи. 7-пи августдин 12-пи августдизкьан му гьядисйириъ Урусатдин Яракьлу кьувватари зат иштирак’вал гъапIундар. Анжагъ 12-пи августдиъ Дагъустандин агьалйириз армияйин терефнаан кюмек апIуз къарар адабгънийи.
Гьадмуган гъачгъарихъди женгнаъ узура учIвнийза. Узухъди академияйиъ урхури гъахьи баяр, яракьра хьади машинариъди, Дагъустандиъ гъягъюрайи гьядисйириъ иштирак хьуз дуфнайи. Думуган гьич сар касдира му шлин дяви ву кIури гьерхри гъахьундар. Вари сатIи духьну, террористариз къаршуди удучIвну», – гъапнийи военкоматдин вакили.
Думу вахтари яракь ча гъапирин хилиз яракь туври, жвуван багъри ватан уьбхюз гъягъюз ккунидар вари гьаъри гъахьну. Гьаци, жиларихъди сабси дишагьлийирира террористарихьан республика азад апIбаъ хайлин зегьмет гъизигну.
«1999-пи йисарин гьядисйир кIваин апIури, террористарихъди женгариъ айи эскрариз гаш дархьбан бадали, хулариъ гьязур апIури, дишагьлийири ипIруб хьади гъюйи. Саспи касари чпиз айи малар урккури, хурагар гьязур дапIну учухьна хуйи. Саб гафниинди, думуган фургьанди ипIруб шуйи, гьич сар касдизра гаш’вал кади гъабхьундар», – ктибтнийи Жамбалаевди.
Гьаци вари сатIи духьну, варидин кюмекниинди цIиб вахтнан арайиъ Дагъустандиан террористар терг гъапIнийи», аьлава гъапIну Явнус Жамбалаевди.
