Мейлан Нежефов
Инсанди чан уьмриъ гъапIу уччвуб гаф ва ужудар ляхнар себеб вуди, учв уьмриан гъушнушра, халкьдин арайиъ дугъан ччвур марцциди ва гьюрматниинди гъубзру.
Гьацдар инсанарикан вуйи вахтсузди уьмриан гъушу табасаран халкьдин мяълийирин устад Фахрудин Гюлечов.
Рягьматлу Фахрудин Гюле-чович Гюлечов бабкан духьну цци 50 йис тамам гъабхьну. Гьяйифки, бейнавайиз багъридарин арайиъ юбилей къаршуламиш апIуб кьадар-кьисмат гъабхьундар.
Гьаму йигъари Хив райондин администрацияйин культурайин, спортдин, туризмин ва жигьиларин ляхнариз лигру отделин регьбер Казбек Къазиев улихь гьучIвну, райондин администрацияйин, багахьлуйирин ва гъарашугъарин кюмекниинди Фахрудиндиз бахш дапIнайи мярака кIули гъубхнийи.
Мяракайиз уч духьнайи райондин администрация-йин гьякимари, багахьлуйири, шаирари ва гъарашугъари Фахрудинди багъри халкьдин культурайиъ гъибтнайи ирснакан ктибтнийи.
«Фахрудин саб вахтнара аьхю ва заан дережайин ччвурар ккунди хъергу кас дар. Чан жикъи уьмриъ дугъу халкьдин арайиъ варитIан аьхю ччвур гъазанмиш гъапIну, ва думу ихь гурлу гарччлари субут апIура», – гъапнийи чан улхбаъ райондин глава Ярмет Ярметовди.
«Фициб мяракайиз учв кьисмат гъахьишра, дугъу ярар-дустарин гевюл ачухъ апIуйи. Дугъаз думу табиаьтди тувнайи савкьат вуйи», – гъапнийи чан улхбаъ шаир, прозаик ва мялим Кюребег Мурсаловди.
Дербент шагьрин табасаран милли культурайин автономияйин председатель, шаир Эльмира Аьшурбеговайи маракьлу теклиф хьади удучIвнийи: «Йиз фикриан, ихь гьюрматлу Фахрудиндин ччвур саб кючейиз, ясана музейиз вушра тувнийиш, харжи даршлийи. Дугъриданра, чан ляхин ккунивалиан дугъу гьациб хатур чахьна гъазанмиш гъапIну. Хъа думу варидарин удукьруб дар», – къайд гъапIнийи шаири.
– «Фахрудин дуст адруриз дуст, гъардаш адруриз гъардаш, гъунши адруриз гъунши вуйи. Гьяйиф думу мици ухди уьмриан гъягъюз», – гъапнийи Дагъустандин халкьдин артист Марьям Къазиевайи.
– «Гьаму ихтибар алдру дюн’яйиин я саб аьмал, я саб кучIал кадру марцци малайиксир кас вуйи Фахрудин. Женнетдин нивкI’ан уягъ даришричав» – давам гъапIнийи Дагъустандин лайикьлу артист Аьбдуллагь Мирзакеримовди.
«Литературайин Табасаран» журналин жавабдар редактор, шаир Шюшеханум Керимовайи кIура: «Гьюрматлу инсанарикан улхруган, Фахрудин сифте вуди фикриз гъюру касарикан сар вуйиз. Чаз зарар шулушра, жарариз гьаддикан мянфяаьт кайихъанмина, фициб вушра, думу ляхин дугъу кIулиз адабгъуйи. Гьациб жумарт юкIв айи ва ихтибар али ватанпервер кас вуйи рягьматлу».
«Гьарган машнакк шаду инчI ккайи, шадвалин ва манишнан акв рабгъури гъахьи кас. Гьяйиф, дугъкан вуйиб вари ккудубшу вахтнаъ пуб алабхъура», – чан улихьна удучIвдарин гафар субут гъапIнийи чан улхбаъ Хив райондин администрацияйин культурайин, спортдин, туризмин ва жигьиларин ляхнариз лигру отделин начальник Казбек Къазиевди.
«Ляхниъ гъарашугъариз, сумчриъ кьавлариз, тухумдиъ багахьлуйириз гьадмукьан гирами, рягьимлу ва берекетлу кас вуйи Фахрудин», – кIура багъри кас уьмриан гъушу ва гъира ирккну айи Фирудин ва Физули Маллаевари.
Фахрудиндин халайин риш Венера Аьбдуллаевайи Фахрудиндин уьмриан саб дюшюш кIваин гъабхнийи: «Саб ражари Фахрудин узухьна хулаз гъюруган, хинкIар апIуз гал алдабкIурайза. Думу хъуркьубси, гьялак духьну, йикк кадабгъну, гал кабхьуз хъюгъза. Йикк’ин чIамчч дубсиган, дугъкан думу ултIубккуб ккун гъапIнийза. «Гъибта. Гьаддизра саб тики ккундарин!?» – жаваб тувнийи дугъу. ЧIамччлинкьа хатур ккибтуз дарши бейнава».
Шаирвалин хатI кайи артист, жямяаьтлугъ кас, вари чан гъянаъ атIабгнайи Фахрудиндиз бахш дапIнайи мярака Дагъустандин культурайин лайикьлу гъуллугъчи Хайир Шаховди, мяълийирин устадар вуйи Кузмин Гьюсейхановди ва Адият Гьямзатовайи дугъан шиърариз дидикIнайи ва дугъан репертуариан вуйи мяълийириинди мярака хъана уткан гъапIнийи.
Чпин хизандин пашманвал кIваин ва чпихъди дерднан учIврушин пай апIбаз лигну. Гюлечоварин хизанди уч духьнайидариз кIваантIан чухсагъул гъапнийи.
