Гюльнара Мягьямедова
БицIирин мелзналан сабпи ражари «дада «кIуру гаф ебхьуру. Дада гьарган гъавриъ шлу, хъайивал апIру, фициб тахсир ктубчIвишра, хил алдабгъру, варитIан багахьлу инсан ву. Ухьу сад йигъанра дадайин ккунивал, сабурлувал, манишин кIваълан гьапIрадархьа, хъа гьюкуматдин календариъ, гьар йигъан ухьу ихь дадйириз апIурайи гьюрмат ктарди, дадайиз бахш вуйи сад йигъ жаради улупна. Дадйириз бахш дапIнайи йигъ ухьуз уьмур туву дишагьлийиз сабсан ражари чухсагъул пуз мумкинвал туврайиб ву. Гьаму йисан Дадайин йигъ 30-пи ноябри, вазлин аьхиримжи элгьет йигъан къайд апIуру.
25-пи ноябри Мягьячгъалайиъ Дадайин йигъаз бахш вуйи серенжем кIули гъубшну. Думу серенжемдиъ Дагъустандин глава Сергей Меликов ва Варихалкьарин исламский бизнесдин ассамблеяйин президент Марат Кабаев иштирак гъахьну. Марат Кабаев Мягьячгъалайиъ шадлугънан серенжем гъабхбан теклифчи вуйи, хъа Сергей Меликовди дугъан теклиф кьабул гъапIнийи. Серенжемдиз теклиф дапIнайидарин арайиъ Урусатдин Игитарин ва хусуси метлеб айи операцияйин иштиракчйирин дадйир, гизаф бицIидар хъайи дадйир ва жямяаьтлугъ гъуллугъарин вакилар айи.
«Гьаму серенжем ухьу ккунивалихьдина, хъайивал апIбахьди абцIнайи асас машквраз – Дадайин йигъаз улихьна гъабхурахьа. Дадайин аку суратну ухьуз читинвалариан кIул адабгъуз, хъуркьуваларихъна гъюз, уж’вал апIуз, Ватан ккун апIуз кьувват тувра.
Гъи ухьу вари ислягьвалик умуд кади яшамиш шулахьа, хъа дадайин веледдихъан вуйи дюаь варитIан кьувватлуб ву. Гьаддиз, гъит, ихь гьарсар дадайин харжи фикрар терг, хъа кIваъ айи ужудар хиялар тамам ишри. Учвуз ва ичв багъридариз ислягьвал, уж’вал, хушбахтлу уьмур ккун апIураза», – гъапну региондин кIулиъ айири.
«Дагъустанлуйириз гьарган дадайин гьюрмат уьбхюб хас ву. Тарихнан китабариъ игит дишагьлийири жилар душмандихъди вуйи женгназ гьаъру гизаф дюшюшарикан дибикIна. Гъийин гьядисйири гъушу вахтарин гьунарарикан кIваин апIура. Гьюрматлу дадйир, гъи учву варитIан аьхю чухсагъулин гафариз лайикьлу вучва. Хусуси метлеб айи дявдин операция гъябгъюрайи ругариин ихь ватанагьлийирин гьарсаб гьунарну абйир-бабарин тербия, дадайин насигьят ву. Ичв рюгьнан кьувватназ, сабурлувализ аферин!» – гъапну Сергей Меликовди.
Главайихъди гюрюшмиш гъахьидарин арайиъ хусуси метлеб айи дявдин операцияйин юкьур-хьур иштиракчи гъюрхю дадйир айи.
Дагъустандин кIулиъ айири кIваина гъабхиганси, республикайиъ хусуси метлеб айи дявдин операцияйин иштиракчйирин хизанариз кюмек тувбан жанлу ляхин гъабхура. Дурарин дадйир, ачIни гъахьи хупар, чйир, читинвалариз дилигди, фондар, комитетар, жямяаьтлугъ тешкилатар ачмиш апIури, жямяаьтлугъ ляхнариъ йигинди иштирак шула.
Сергей Меликовди Кизляр райондиъ ачмиш гъапIу «Гьюрматнан багъ» тешкил гъапIу Хадижат Сайкумова кIваин гъапIнийи.
Дагъустандиъ гизаф бицIидар айи 125 агъзур хизан яшамиш шула. Дидин гьякьнаанра Сергей Меликовди дадйириз бахш вуйи серенжемдиъ гъапнийи. Машквраз дуфнайидарин арайиъ 10-тIан артухъ бицIидар гъюрхю дадйирра айи: Асият Мягьямадова, Руманият Шамхалова, Саврижат Рамазанова, Наида Татаева.
Сергей Меликовди Урусатдин Президент Владимир Путиндин гафар кIваин гъапIнийи: «Гизаф бицIидар айи хизанар «Урусатдин гележегдин бина ву». Гизаф бицIидар айи хизандиъ вердиш гъахьидариин хъугъвал апIуз шулу. Дурари я дустар, я гъарашугъар, ясана багъри Ватан масу тувидар».
Дагъустандин кIулиъ айири рягьимлувалин проектар уьмриз кечирмиш апIбаъ иштирак хьувализ дилигну, рабочий визитдиинди Дагъустандиз дуфнайи Варихалкьарин исламдин бизнесдин ассоциацияйин президент Марат Кабаевдиз чухсагъул мялум гъапIну. «Марат Вазихович гизаф месэлйир гьял апIбаъ Дагъустандин ужур дуст ву. Яв жягьтлувалиинди Исламдин бизнесдин ассамблеяйи уьлкейиъ хайлин рягьимлувалин проектар уьмриз кечирмиш апIбак пай кивра. Уву цIибди гафар, гизаф ляхнар апIру инсанарикан сар вува. Гьаму баркаллу ляхниъ увуз хъуркьувалар ккун апIураза. Ихь аьлакьйир гележегдиъра мюгькам шлувалик умуд кайиз», – гъапну региондин главайи.
Дадйирин йигъаз бахш дапIнайи серенжемдиъ Дагъустандин муфтий, шейх Аьгьмад Афанди Аьбдулаевра удучIвну гъулхнийи. Республикайин мусурмнарин кIулиъ айири гьарсар касдин уьмриъ дадайи гъабхурайи ролин важиблувал кIваин гъапIнийи. «Дагъустан чан шаирариинди, спортсменариинди, аьлимариинди машгьур ву. Инсан фукьан машгьур гъахьишра, му дюн’яйиз думу гъахир дада вуйиваликан гьархну ккундар. Веледар аьхю гъахьишра, дадайиз дурар бицIидарди гъузру. Дадйир гьюрматназ лайикьлу ву. Женнет дадайин ликарин кIанакк кка, кIура гьядисдиъ. Гъи гизаф дадйирин веледари Ватан уьбхюра. Вари дадйириз сабур, сагъвал, ярхи уьмур, хусуси метлеб айи дявдин операция шлубкьан ухди ккудубкIуб ккун апIураза», – гъапнийи Аь. Аьбдулаевди.
Сергей Меликовди Гъизилин Хядраз лайикь гъахьи Дагъустандиан вуйи Игитарин дадйирра машкврахъди тебрик гъапIну. Дурарин арайиъ Мадина Абуталимова, Марина Исбакиева, Лейла Къараева, Сабина Мягьямадова, Магьизат Мягьямадова, Сапижат Мазаева, Валида Муслимова, Суна Набиева, Хунчаназ Султанова, Маликат Умаева ва ПатIимат Худайнатова айи. Дурарикан бязидари жямяаьтлугъ ляхнар гъахури, тмундари худлариз тербия туври, вари женгариъ айи баяриз ккилигура.
Республикайин главайи ихь дишагьлийири баяриз ужуб тербия тувбаз, дурарин рюгьнан кьувватназ чухсагъул мялум гъапIнийи.
Серенжемдин иштиракчйирихьна хусуси метлеб айи дявдин операцияйиъ кьюр бай гъийиху дада Любовь Попова илтIикIнийи. Дугъу, гъийиху эскрарин дадйирихъди гюрюшмиш шули, дурариз сабур тувру, дурарин юкIв ижми апIру сюгьбатар гъабхури гъахьнийи, хъа гъи женгариъ айидарин дадйириз чпин баяриз ккилигуз кьувват ккун гъапIнийи. «Ичв кIвак кайи къурхулувалин гъаври аза, хъа ичв хъугъвали ва дюъйири эскрариз кьувват тувра. Халис жилар вердиш апIбаз учвуз чухсагъул», – гъапнийи дугъу. Гьацира Любовь Поповайи хусуси метлеб айи дявдин операцияйин иштиракчйирин хизанариз кюмек тувуз Сергей Меликолвдиз чухсагъул гъапнийи ва уч духьнайи дишагьлийир даДадайин йигъахъди тебрик гъапIнийи.
