Умганат Сулейманова
Аьхиримжи вахтари ихь миллетдин вакилари спортдиан заан хъуркьувалар гъадагъура. Москва шагьриъ яшамиш шулайи ихь ватанагьли, жигьил футболист Тимур Сулейманов Урусатдин премьер-лигайиъ иштирак шулайи «Локомотив» командайин хъуркьувалар айи кIубан уйинбаз ву.
Жигьил футболистдин абйир-бабар Дербент райондин Мамедгъалайиан ву. Тимур урчIвуд йисаъ ади, дурарин хизан Москвайин Люблино райондиз кюч шулу. Дина гъушубси, Тимур чав урхурайи 338-пи мектебдин ва жара клубарин жюрбежюр кчIихбарин секцйириз гъягъюри, спортдиин машгъул гъахьнийи. Хъа вахт ккабхъубси, чан бицIину чвера хъади, гьяятдиъ футбол, волейбол ва тупрахъди вуйи жара тамшир апIури гъахьнийи. Физкультурайин дарсариъра чав кIубанди улупу балихъ мялимди ул хъибтри гъахьнийи. Ва йигъарикан сад йигъан дугъу Тимуриз: «Увуз фикир туври гизаф вахт вуйиз, туп ужиди уйнамиш апIурава», – дупну, урхурайирин улихь «Сокол» клубдин футболин секцияйиз гъягъювалин теклиф дивнийи. Мялимдин гафназ фикир туву Тимур, гъабхьиб хьибди дупну, 13 йисандин яшнаъди футболин клубдиз гъягъюру. Гьелбетда, уьмрин рякъюъ ужуб ляхнихъ хъаъру касдин теклифарихъ хъпехъиган, инсандин гележегра ужуб шулу: физкультура дарснан мялимди фикир тувбиинди, Тимурин уьмриъ аьхю дигиш’валар ва заан хъуркьувалар гъахьну.
Москва шагьрин «Сокол» кIуру футболин клубдиъ тербия гъадабгъурайи Тимури кьюб фаслин арайиъ 30 гол ирчну. Дугъан сарпи тренер Алексей Николаевич Леонов вуйи. Думу вахтари Тимур хъана жара тренерарин гюзчиваликк ккахъну, гьадму гьисабнаан «Соколин» кIулин тренер Виктор Артюховдинра. Думугандиз В. Артюхов пишекарвалин ужуб дережайиз удучIвнайи Ашрак Корян ва Рифат Жемалитдинов кIуру футболистар гьязур гъапIу ужур тренер вуйи. Тимуриз «Краснодар», «Локомотив» ва «Динамо» клубариз теклифар ади гъахьнийи, амма жигьил уйинбазди Виктор Артюховдин мясляаьтниинди «Локомотив» футболин клуб ктабгъну. Ва швумалра гъахьундар, фицики му командайин дахилнаъди думу 2019/2020-пи йисандин футболин фаслиъ думу Урусатдин чемпионатдин арсран медалин сагьиб гъахьну. Тимури «Нижний Новгород» клубдиъра футбол уйнамиш гъапIну. Думу 2019-пи йисан Урусатдин живанарин сборный командайин дахилнаъди, хъа 2019-2021-пи йисари Урусатдин жигьиларин сборный командайин дахилнаъди жюрбежюр уьлкйирин милли командйирихъди вуйи матчйириъ иштирак гъахьну.
Тимурин пишекарвалин кьисматнаъ абйир-бабарин роликан улхуруш, кми-кмиди футболин клубар гьюдюхюрайи бализ дурари саб артухъ фикир туври гъахьундайи. Гьамци, багахьлуйирикан саринкьан кюмек дарди, анжагъ чан бажаранвалиан Тимури гъи «Локомотив» командайиъра, Урусатдин жигьил футболистарин уьмуми командайиъра кIакIнан йишв бисура.
Тимурин заан хъуркьуваларикан яркьуди бикIуз ният ади, думу Дагъустандиз гъафиган, газатдин редакцияйиъ гюрюшмиш хьуз мясляаьт дапIнача. Хъа гьеле редакцияйин терефнаан ихь жигьил ватанагьли Тимур Сулеймановдиз хъана заан хъуркьувалар ккун апIурача.
