Мейлан Нежефов
Ухьуз мялум вуйиганси октябрин хьудпи йигъ мялимарин пишекарвалин йигъ ву. Урусатдин саки вари шагьрарин ва районарин мектебариъ, администрацияйин идарйириъ, мялимар му йигъахъди марцци кIваан тебрик апIури, жюрбежюр серенжемар кIули гъахури шулу.

 

Магьа нубатнан ражари му йигъ Хив райондин РКДЦ-йиъ аьхюди ва яркьуди къаршуламиш гъапIну. Райондин глава Ярмет Ярметовди ва образованиейин отделин кIулиъ айи Назаряли Тарлановди уч духьнайи мялимарин адресназ хайлин мани ва ягъурлувалин гафар-чIалар гъапнийи. Дурари чпин улхбариъ къайд гаъпIганси, му машквар вари аьламдиз варитIан маниб ву, фицики гъи гьарсар пишекарвалин рякъюъ айи инсан чан вахтна мялимдин хиликк дарс урхури гъахьир вуйи.

Серенжемдиъ чпин ляхниъ заан хъуркьувалар гъазанмиш дапIнайи мялимар администрацияйин терефнаан гьюрматнан ва чухсагъул мялум апIбан кагъзариинди, кюкйирин кунцIариинди ва пешкешариинди лишанлу гъапIнийи.

Мидланра савайи, мектебариъ урхурайидари мялимариз гьязур дапIнайи бицIи сягьнйир улупнийи, дурариз шиърар гъурхнийи, мяълийир ва ялхъвнар гъапIнийи, халкьдин музыкайин алатариин мукьмарра гъивнийи.

Мяракайин аьхириъ табасаран ва лезги халкьарин сягьнайин артистари мялимарихьна вуйи чпин кIван манишин ва гьюрмат улупури, дурариз бицIи концерт улупнийи. Думу концерт чан мяълийириинди Дагъустандин лайикьлу артист Марьям Къазиевара гъабалгнийи.