Зубайдат Шябанова
Гьаму йигъари Табасаран райондин гимназияйин бинайиин вари Урусатдин «ВаритIан ужур мялим» конкурсдин муниципальный этап кIули гъубшну. Конкурсдиз райондин 35 мектебдиан заявкйир дуфнайи.
Сабпи пайнаъ иштиракчйири чпин методикайин тажрубайикан, урхурайидар тербияламиш апIбан ва аьгъювалар тувбан рякъюъ дурари ишлетмиш апIурайи деврин образованиейин асас къайдйирикан ктибтну. Аьхюну пай иштиракчйири чпин презентацйир мультимедийный къайдайиинди гьязур дапIнайи. Сабпи этапдиан ургур мялим финализ удучIвну.
Кьюбпи пайнаъ конкурсдин иштиракчйири уч духьнайи мялимариз ва жюрийин вакилариз чпи гьязур дапIнайи ачухъ дарсар улупну. Жюрийи асас фикир дарснан тешкиллувализ, урхурайидарихъди вуйи сигъ аьлакьайиз, деврин технологйир ва аьгъювалар тувбан методикйир дарснаъ ишлетмиш апIувализ туврайи.
Конкурсдин натижйириинди жюрийи гъалибчи ва пешкешнан йишвариз лайикь гъахьидар гъядягъну. Гьаци, «2025-пи йисандин варитIан ужур мялим» муниципальный этапдиъ Табасаран райондин гимназияйин ккергъбан классарин мялим Эльмира Гьямидова гъалиб гъахьну. Кьюбпи йишваз райондин кьюр мялим – ГьепIил гъулан мектебдин тарихдин ва обществознаниейин дарсар киврайи Разеда Аьбдуллаева ва Хючна гъулан 2-пи нумрайин мектебдиъ урус чIал ва литература киврайи Рягьимат Аьзизова лайикь гъахьнийи. Конкурсдин шубубпи йишвра кьюр мялимди чпин арайиъ пай гъапIну – Ярса гъулан мектебдиъ биология дарсар киврайи Севиля Аьгьмадхановайи ва Хюрикк гъулан мектебдиъ физика дарсар киврайи Асият ШабутIаевайи.
Муниципалин этапдиъ гъалибвал гъадабгъу Эльмира Гьямидовайи «2025-пи йисандин Дагъустандин варитIан ужур мялим» республикайин дережайин талитариъ иштирак хьиди.
Ич сюгьбатнаъ Эльмира Гьямидовайи къайд гъапIганси, конкурсдиз думу гъалиб хьуз кьаст ади, бегьем гьязур духьну гъафнийи.
«ИкибаштIан, фунуб конкурсдиъси, мялимарин конкурсра гъагъиб шулу. Конкурсдин иштиракчйирин арайиъ ужуб тажруба айи, хайлин йисари мектебариъ гъилиху ва конкурсдихьна ужуди гьязур духьну дуфнайи мялимарра айи. Хъа узу лихури гьеле хьуд йистIан дариз, гьаддиз гъалиб шулу кIури, фикирра апIурадайза. Амма узуз конкурсдихьна гьязур хьуз йиз директор Элина Шихмягьямедовайи ва директорин ккергъбан классарин цирклиан вуйи заместитель Мафият Гьяжиаьлиевайи хайлин кюмек гъапIунзуз. Дурарин ва ич коллективдин мялимарин кюмекниинди узу гъалибра гъахьунзу, чухсагъул чпиз. Мафият Мирзаевнайи гьамусра сикин дарди узуз кюмек тувра.
Сабпи этапдиъ йиз тема «Игровые технологии» кIуруб вуйи. Яна узу, жигьил пишекриси, деврин образованиейиъ ишлетмиш апIурайи асас технологйирин кюмекниинди фици дарс гъабхуруш, улупунза. Иштиракчйириз му цирклиан презентация улупуз 10 дакьикьатIан туврадар. Жюрийиъ 20-рихьна вакилар айи. Презентацияйин кьяляхъ варидари суалар хъирчри гъахьну.
Кьюбпи этапдиъ дарс кивуз учу Хючна гъулан 1-пи нумрайин лицейиз гъушнийча. Мушваъ дарс кивбан себеб гьадму гъабхьнуки, конкурс гъябгъюрайи йишв гимназия вуйивализ ва узу гьадушван мялим вуйивализ лигну, узуз му этапдиъ душваъ иштирак хьуз ихтияр адайи. Конкурсдин жюрийин вари вакилар йиз дарсназ Хючна гъулан мектебдин 1-пи нумрайин лицейиз гъафну. Имбу иштиракчйирин конкурс гимназияйин бинайиин гъубшну.
Гьамусяаьт узу образованиейин артмиш’валин Дагъустандин институтдиъ пишекарвалин дережа за апIру курсариз дуфназа ва мушваъ цIийи йисан январин вазлин аьхирариъ гъябгъру республикайин конкурсдиз гьязур шулаза», – гъапну ич сюгьбатнаъ Эльмира Гьямидовайи.
КIваин апIурача, му конкурс гъабхбан асас метлеб – яратмиш’валин жягьтлувал ва цIийи мумкинвалар артмиш апIуб, бажаранлу мялимар ашкар апIуб, улихь хьайи мялимарин тажрубайихъди таниш апIуб, мялимарин зегьметнан ад за апIуб ва райондин ужударстар мялимариз кюмек тувуб ву.
