Гюльнара Мягьямедова
25-пи октябриъ Табасаран райондин глава Мягьямед Къурбанов хусуси метлеб айи дявдин операцияйиъ гъийиху эскрарин хизанариз кюмек тувру Дагъустандин региондин «Вари сатIиди» фонднан директор Селимхан Мирзехановдихъди гюрюшмиш гъахьну.
Гюрюшдиъ Селимхан Мирзеха-новди мялумат тувганси, сентябрин вазлиъ РД-йин зегьметнан ва яшайишдин артмиш’валин министерствойин кюмекниинди женгнан машгьурвалин китабдин сабпи пай чапдиан удубчIвнийи. Китабдиъ СВО-йин женгариъ Ватан бадали гъийиху кьягьяларикан, душваъ гьамусра яракьлу кувватарин жергйириъди иштирак шулайи дагъустанлуйирин игитваликан кидибтна. Мирзехановди къайд гъапIганси, женгариъ гъийиху гизаф кьягьялар чпин урхурайи вуз ккудубкIуз, хизан ккебгъуз хъуркьундар, дурари уьлкейин ужуб гележег бадали, чпин жанар дивну.
Фонднан директори мялумат тувганси, китабдин кьюбпи пайра гьязур апIура. Дидиъ саб пай Дагъустандин районариз, гьадму гьисабнаъди Табасаран райондизра, жара дапIна. Думу Мягьямед Къурбановдихьна муниципалитетдиан СВО-йиъ иштирак шули гъийиху эскрарикан материал уч апIуз кюмек ккун апIури, илтIикIнийи.
Гьаддихъди аьлакьалу вуди, муниципалитетдин главайи чан заместитель Ринат Мирзабалаевдиз культурайин управлениейихъди, муниципалитетдин образованиейин управление-йихъди сатIиди игитар кIваинди уьрхру китаб чапдиан деебтбан бадали, материал уч апIуз кюмек тувру рабочий десте тешкил апIуб табшурмиш гъапIну.
«Ихь халкьдин вакилар ватанперверар ву. Табасаранарикан юкьур кас Урусатдин Игитар духьнайивали, гизаф ихь ватанагьлийир орденариинди ва медалариинди лишанлу дапIнайивали йиз гафар субут апIура. Райондин агьалйир гьамусра контрактдиинди Урусатдин Федерацияйин Яракьлу Кьувватарин жергйириз гъягъюри ими, дурар вари СВО-йин зонайиз чпин хушниинди гъягъюра», – гъапну Мягьямед Къурбановди.
Гюрюшдиъ Табасаран райондин депутатарин Собраниейин председатель Иса Исаев, райондин главайин заместитель Ринат Мирзабалаев, райондин военный комиссар Садикь Мурадялиев, «Дадйирин кьувват» сообществойин член, СВО-йиъ кечмиш гъахьи эскрин дада Армине Аьбдуризаева, райондин социальный гъуллугъарин ва гьацир идарйирин кIулиъ айидар, жямяаьтлугъ тешкилатарин вакилар, райондин КЦСОН-дин бинайиинди лихурайи координаторар иштирак гъахьнийи.
Къайд апIуз кундузуз, женгнан машгьурвалин китабдин сабпи пай «Табасарандин нурар» газатдин редакцияйизра тувна. Гьелбетда, думу китабдихъди таниш гъахьунча, Табасаран ва Хив районариан СВО-йин швнур иштиракчийикан дибикIнаш, гьисаб гъапIунча. Вари 15 касдикантIан мялуматар тувнадар.
Учу, СВО ккебгъу йигъланмина, газатдин юкьубпи машнаъ рубрика ачмиш дапIну, гьарсаб нумрайиъ Табасаран ва Хив райондиан вуйи СВО-йин иштиракчйирикан, дурарин кьягьялваликан, уьмрикан бикIурача. СВО-йиъ иштирак гъахьи ва шулайи ихь миллетдин вакиларин кьадар аьхюб ву. ГьапIуз вуш, китабдин машариъ дурариз цIибтIан фикир тувнадар. Гьаци дархьбан бадали, ккун апIурача, СВО-йин иштиракчйирикан мялуматар жиниди мигъитанай.
