Зубайдат Шябанова
Мурад Сабирович Султанов Хючна гъул’ан ву. Владикавказдиъ айтIан кьушмарин Кафари Кавказдин военный институт ккудубкIбан кьяляхъ думу уьлкейин жюрбежюр йишвариъ военный гъуллугъариъ гъахьну. Гьамусяаьт, подполковникдин звание ади, Пензенский областдиъ Росгвардияйин военный гъуллугънаъ а.
Гъубшу йисан август вазлилан ццийин январ вазлин аьхирариз Мурад Султанов Украинайин ругариин Запорожьейин терефнаъ гъябгъюрайи хусуси метлеб айи операцияйиъ иштирак гъахьну. Гьамусяаьт ихь офицер Табасаран райондин Хючна гъулаз чан дадайиин ва багахьлуйириин улукьуз дуфна. Узу дугъахъди сюгьбат гъубхунза.
«Военный гъулугънан пишекарвал гъадабгъу 2010-пи йисхъанмина узу ихь ватандин хайлин регионариъ гъилихунза. Хъа Пензайиъ айи вахтна хусуси метлеб айи дявдин операцияйиз гьаунчу. Дявдиъ гьииди шлуб дар, хъа аьрзйир апIузра хай даршул. Ухьуз, му операцияйин метлеб фу вуш, аьгъяхьуз. Ухьу сариинкьан алархьнадархьа. Ухьу ихь Ватан, Урусатдин ватандаш халкьар уьрхюрахьа…
Улихьна йисан му дявдин операция-йиъ айи эскрариз районариан, шагьрариан кюмек гизаф гъюйи. Саб пуз ккундузуз: варитIан гизафси учу гьадму женгнаъ айи эскрариз бицIидарин багъариъ айи ва мектебдиъ урхурайи баяр-шубарихьан кагъзар гъювалиин шад шуйча. Думу кагъзари ва дурарик дидикIнайи кIваантIан вуйи мани гафари, учуз кьувват туври, женгариъ гъалиб хьуз кюмек апIури гъахьну. Гьадму бицIидари дизигну хъадаънайи шиклар цаларик керхну шуйча. Думу кагъзар урхруган, гьарсар эскриз чан веледар кIваин шуйи…
Узухъди СВО-йиъ йиз имдин бай Ризванра хъазухъ. Жвувандар ва хъугъвал али инсанар гъвалахъ хъайиган, наан вушра ихтибарлуди, гьииди ва кIваз архаинди шулу. Узухъди кьюр Хив ва шубур Табасаран районариан ихь баяр хъайзухъ. Пуз ккундузуз, ихь баяри, жарадарихь тевган, гьадмукьан чпи ватанперверарси, игитарси, дирбшарси, сарихьанра ва сабдихьанра гучI кадрударси улупураки! Жара миллетдин баяр зяифди ву кIурайи гаф дариз, дурарин игитвалариканра хабар ахьуз. Узу, думу игитарик тевган, ихь баярин гьиссарин кьувват кьюб ражари зиина ву, кIураза. Хусуси метлеб айи дявдин операцияйиъ табасаран баяр хайлиндар а. Узу гъалатI шуладарш, Дагъустандиан гъи СВО-йиъ айи баяр вари гьисаб гъапIиш, варитIан гизаф Табасаран райондин вакилар ву. Ихь баярин дирбаш’вал ухьухьна ихь абйирин ифдикди дуфнайиб ву. Дурар фици немец чапхунчйирихъди игитарси женгариъ гъахьнуш, гьадму гьевес ва ватан ккунивалин гьиссар гъи баяри мушваъра улупура. Ихь абйири туву ватанпервер тербия гъюдубчIвундар. Саки гьар йигъан ихь баяр медалариинди, орденариинди, гьюрматнан грамотйириинди лишанлу апIура. Фициб серенжем гъябгъюрашра, душваъ пешкешар тувру вахтна табасаран вакил гъядарди шулдар. Миди ихь миллетдин ватанпересваликан ва ватанперверваликан кIура. Узу, ихь эскрар Ватан уьбхрударин йигъахъди тебрик апIури, варидариз сагъвал, ягъурлувал, сабур ва, чпин хизанарихьна дуфну, бахтлу гележег ккун апIураза», – гъапнийи Мурад Султановди.
Ихь игит эскер хусуси метлеб айи дявдин операцияйиан бицIи вахтназ отпускдиз гьаънайир ву. Гьаму гьяфтайин султ йигъан думу кьяляхъ хътакура. Райондиан думу сифте чан частназ ва чан хизандихьна Пензайиз гъягъюру.
Хючназ дуфну имиди, Мурад Султанов Табасаран райондин глава Мягьямед Къурбановдира кьабул гъапIнийи. Гюрюшдиъ подполковникди райондин кIулиъ айидариз ихь эскрарин вафалуваликан ва дирбаш’валикан ктибтну, райондин агьалйириз ва главайиз фронтдиъ айи эскрариз рягьимлувалин кюмекар хътаувализ, эскрарин хизанариз гьаммишан фикир ва кюмек туврайивализ чухсагъул мялум гъапIну.
