Гюльнара Мягьямедова
Ватандин Игитарин йигъан, 9-пи декабри Дагъустандин кIулиъ айи Сергей Меликов Урусатдин Федерацияйин Игитарин хизанарихъди, хусуси метлеб айи дявдин операцйириъ игитвал улупу МВД-йин гъуллугъчйирин багахьлуйирихъди гюрюшмиш гъахьну. Думу серенжемдиъ читин аьгьвалатнаъ дирбаш’вал улупу бицIидар ва набалугъар, жигьиларин ва жямяаьтлугъ тешкилатарин вакилар, кадетар, юнармейцйир, республикайин образованиейин идарйирин ва ветеранарин тешкилатарин кIулиъ айидар иштирак гъахьнийи. Республикайин главайи уч духьнайидар машквран йигъахъди тебрик гъапIнийи.
«Багъри ругарихьна вуйи ккунивал наслиан наслиз гъябгъюру. Гьаму, Гъалибвалин 80 йисаз бахш дапIнайи ярхи йис уьлкейиз гъагъи йисари рюгьнан аьламатнан кьувват улупу ихь ветеранарин ва Ватан гъюбхдарин игит наслариз бахш гъапIунхьа», — гъапну республикайин кIулиъ айири.
Сергей Меликовди республикайин агьалйири, яракь хилиз гъадабгъну, багъри ругар ва уьлкейин сабвал гъюбхю 1999-пи йисандин августдин ва сентябрин гьядисйир кIваина гъахнийи. «Гъи Урусатдин Федерацияйин Игитарин арайиъ Дагъустандин ОМОН-дин командир, полковник Загид Загидов, ФСБ-йин полковник Мягьямед Гимбатов айивалиин гизаф шад вуза. Гьаму заан наградйир гъадагъайиз, Ватан бадали чпин улихь дивнайи месэлйир тамам апIури, дурар швнуб-саб ражари гъагъи аьгьвалатнаъ, уьмринна аьжлин сяргьятниин алди гъахьну, амма саб ражнукьан кIул ис гъапIундар», — гъапнийи региондин главайи.
Дугъу гьацира Дагъустандин гьарсаб гъулаъ ва шагьриъ айи эскервалин жюрэтлувалин хизандин аьдатар чешнеди гъидиснийи: «Дявдин женгнаъ, чан сенгриъ, чав дибиснайи кIакIниин, женгнаъ юлдаш уьрхюри гъийихдарин, амма кьяляхъ дархьидарин улихь кIул ис апIурахьа, дурариинди дамагъ апIурахьа. Дурар вари кIваъ уьрхюрахьа», — давам гъапIнийи чан улхуб Сергей Меликовди.
Серенжемдиъ Ригъ гьудубчIвру терефнан дявдин округдин уьмуми кьушмарин 36-пи армияйин стрелковый взводдин командир, аьхюну лейтенант Къурбан Аьбдурягьмановра айи. Дугъу, чан хиликк ккайи эскрарин уьмрар дюрхну, душмандин далу терефнаъ чан улихь дивнайи месэлйир тамам гъапIну.
Сергей Меликовди къайд гъапIганси, Ватандин Игит гьарган спецназдин офицер, морпех, ясана десантник вуди шулдар. Техника, яракь арайиз хру инженерихьанра, гьюкуматдин хатIасузвал уьбхюрайи программистдихьанра, дявдин операцйир гъягъюрайи йишв’ан мялуматар тувру журналистдихьанра, гьюкуматдин маракьар уьрхюри, дюн’яйин сягьнайиин али спортсмендихьанра Ватан уьбхюз шулу.
Республикайин кIулиъ айири меркк йивнайи штуккан бицIи бай ккадагъу Залму Индуховайин, Мягьячгъалайиъ террориствализ аькси операция гъябгъюрайи вахтна къанун уьбхру органарин гъуллугъчйириз шид туври гъахьи Аьбдулбасир ва Мягьямедшапи Нурмягьямедоварин – гьаму бицIи игитарин ччвурарра ахьнийи.
Дагъустандин главайи вари уч духьнайидариз чухсагъул мялум апIури, жигьиларикан чпин абйирин игит наслар кIваинди гъибтуб ккун гъапIнийи.
Серенжем гьюкуматдин наградйир тувбиинди ккудубкIнийи.
