Мейлан Нежефов
Гьаму йигъари вари уьлкейиъ къайд гъапIу Хизандин, мюгьюббатнан ва вафалувалин йигъан Хив райондин культурайин цирклин вакилар ЦIинитI гъулан Гюльмурад ва Венера ТIаибоварин хизандиин улукьуз гъушну.
Хяларди гъушу дестейин дахилнаъ айи Хив райондин ЦБС-дин директор, Хив райондин дишагьлийирин советдин председатель Зумрият Сяидягьмадовайи ич сюгьбатнаъ къайд гъапIганси, ТIаибоварин хизан вари райондиъ гьюрматлу хизанарикан саб ву.
«Гюльмурад ва Венера ТIаибовари хал-хизан ккебгъну 25 йис шула. Дурари шубур бай ватанпервервалиинди тербияламиш гъапIну. Гъи дурарикан кьюри Украинайин аьтрафариин гъябгъюрайи хусуси метлеб айи дявдин операцияйиъ Ватандин аьтрафар уьрхюра. Аьхюну бай Мурадхан 2018-пи йисхъанмина Урусатдин Яракьлу кьувватарин жергйириъ Волгоградский областдиъ а. Хусуси метлеб айи дявдин операция ккебгъу сабпи йигъланмина думу душваъ вартIан улихь жергйириъ а. Мурадхан Суворовдин, Жуковдин, «Эскервалин игитвал улупбаз лигну» II дережайин медалариинди ва Сирияйиъ гъягъюри гъахьи дявдин гьяракатариъ иштирак хьпаз лигну, кьюбсана медалиинди лишанлу дапIна.
Кьялану бай Мурадагъа ТIаибовди 2018-пи йисхъанмина Крымдиъ Росгвардияйиъ гъуллугъ гъабхура. Думура гьамусяаьт хусуси метлеб айи дявдин операцияйиъ иштирак шула.
БицIину бай, аьхюнур лейтенант Мурадяли ТIаибовди Воронеждин Военно-воздушный академия ккудубкIбан кьяляхъ, Дальний Востокдиъ гъуллугъ гъабхура.
Дурарин адаш, Гюльмурад Султан-мурадович Урусатдин образованиейин Гьюрматлу гъуллугъчи, РД-йин образованиейин отличник ву. Думу бажаранлу касди ЦIинтIарин мектебдиъ биологияйин дарсар киври хайлин йисар ву. Дугъу чан баркалу зегьметниинди, урхурайидаринси, гъулан жямяаьтдинра гьюрмат гъазанмиш гъапIну. Гюльмураддин уьмрин юлдаш, веледариз ужур дада, хизандин даягъ Венера чан жилирин ва веледарин гьарсаб гафнахъди рази ву. Учу хяларди гъюбахьнара дурарин хизан гьязур духьнайи. Миди дурарин хялар кьабул апIуз аьгъюваликан кIура.
«…Мидланра гъайри, гъи учу райондин культурайин кIулиъ айи Казбек Къазиевдихъди, Хив райондин УСЗН-дин директор Рафидин Юсуфовдихъди, Ургъа гъулан Гьясановарин ва Асккан Яракк гъулан Исмяиловарин хизанар тебрик апIуз гъушунча. Думу хизанарра Хив райондин ватанпервервалин ва вафалувалин намуналу хизанар духьна. Гьясановарин шубур бай ва Исмяиловарин юкьур бай хусуси метлеб айи дявдин операцияйиъ а. Дурарин баркаллу ва игитвалиинди гъабхурайи ляхниз гьюкуматдин ва ведомствойин наградйир тувна.
Кьюбиб хизанар РД-йин зегьметнан ва социалин артмиш’валин министерствойи грамотйириинди ва «Мюгьюббатназ ва вафалувализ лигну» медалиинди лишанлу гъапIну».
Дурарин хизан чпин вафалувалиинди, ватанпервервалиинди, кьягьялвалиинди райондиъ хайлиндариз нумуна ву. Гъит дурар хъана бахтлу ибшри, ва багарихьди дурарин веледар, гъалибвал гъадабгъну, кьяляхъ гъюри!» – гъапнийи Зумрият Сяидягьмадовайи.
