Нариза ТIаибова

Ватан уьбхрударин йигъан гъаншариъ Хиварин спорткомплексдиъ Дагъустандин Халкьдин Собраниейин депутат Алавудин Мирзабалаевдин пешкешариз вуйи волейболин талитар кIули гъушну.

 

Волейболиан талитар гъахувал аьдатназ илтIибкIна гъапишра, кучIал шулдар, фицики цци депутатдин жягьтлувалиинди ва кьувватариинди му серенжем кIули гъабхури 24-пи йис ву.
Райондин жигьилар машкврахъди тебрик апIури, РД-йин Гьюкуматдин секретарь Нюсрет Омаровди гъалибчйир ва вари спортсменар къаршуламиш гъапIну.

– Тялукь уйнамишари ухьуз нубатнан ражари гьамцдар дуствалин майднариъ халис игитар ва ватанперверар артмиш шулайивал субут апIура. Фунуб ляхниъра, сар-сарин гъаври духьну, уьмумивалиинди кьабул гъапIу гьяракатари заан натижйирихъна хури аьдат ву, – аьлава гъапIу дугъу.
Хив райондин глава Ярмет Ярметовди, волейболистар тебрик апIури, кьюб миллетдин вакилари дуствалиинди ва сабвалиинди райондиъ спорт артмиш апIбан жигьатнаан кьабул апIурайи уьлчмйирикан гъапну.

Маракьлуди гъуху талитарин натижайиъ АрхътIарин волейболистари гъалибвалин йишв гъибисну.
2-пи ва 3-пи йишварин сагьибар ГъуштIларин ва Асккан Ярккарин командйир гъахьну.
Гъалибчйир пулин пешкешариинди лишанлу гъапIну.