Мейлан Нежефов

Дагъустан Республикайин Конституцияйин йигъ улубкьайиз улихьна йигъан Хив райондин «Сарпидарин гьяракат» тешкилатдин улихь-кIулихь хьайидар Украинайиъ гъабхурайи хусуси метлеб айи дявдин операцияйин иштиракчйирихъди гюрюшмиш гъахьну.

 

Гюрюшмиш хьпан метлеб Ватан уьбхрурин йисан хусуси метлеб айи дявдин операцияйиъ иштирак шулайи ихь эскрарин яшайишдикан, дурарин кьягьялваликан сюгьбатар гъахуб вуйи.

Серенжемдиъ РД-йин юстицияйин министерствойин Кьибла жиларин округдин Хив райондиъ айи ЗАГС-дин управлениейин кIулин пишекар-эксперт Гюльзана Самадова, Мажвгларин гъулан советдин глава Мейлан Нежефов, «Аку хяд» газатдин кIулин редактор Рамазан Къалабегов, муниципальный «Сарпидарин гьяракатнан» координатор Рауф Аьгьмадов иштирак гъахьнийи.

Хусуси метлеб айи дявдин операцияйин иштиракчйир Байрамбег Байрамбеговди ва Насир Наврузовди баяр-шубариз чпин уьмрикан, Ватан уьбхюб гьарсар касдин заан буржи вуйибдикан, дявдин операцияйин вахтна ихь эскрарин чвевалин аьлакьйирикан, эскрари улупурайи игитваларикан ктибтнийи.

Гьаму жюрейин серенжемари жигьиларин ватанпервервалин гьиссар мюгькам апIуз, уьлкейин кьудратлувалиинди дамагъ апIуз мумкинвал тувру.