Аьхиримжи варж йисандин арайиъ Урусатдиъ чан гьюкмин мюгькамвал ва кьюдварждихьна миллетарин сабвал имтигьян апIру гьядисйир гизаф гъахьну. Тазади арайиз дуфнайи Советарин гьюкумат гъюбхю Ватандаш’валин дявдиъ, XX-пи аьсрин вартIан пис уьзур вуйи фашизмдихьан дюн’я азад гъапIу Ватандин Аьхю дявдиъ, 1990-пи йисари ухь’ина алжагъури гъахьи варихалкьарин террористарихъди гъахьи женгариъ, азад уьмур ва аку гележег бадали Афгъанистандиъ, Абхазияйиъ, Сирияйиъ ва гьамус миллетчивалинна бандерайин терефкрарихъди Украинайиъ гъябгъюрайи хусуси мяна айи дявдин операцияйиъ Урусатдин кьушмари душмнарин пис кьастар дагъитмиш дапIна. Жвуван Ватан, халкь ва гъюрайи насларин азад гележег бадали вуйи му ляхник табасаран халкьдинра гьарсаб хизандин лайикьлу пай ка.

23-пи февраль ихь Ватан уьбхбан гъаразнаъ ади гъахьикьандариз варидариз ва абйирин дирбаш’валин пайнакан гъадабгънайи гъийин жюрэтлу эскрариз «баркаллагь» кIуру йигъ ву!

Урусатдин яракьнан ва Ватан уьбхру эскервалин гьевеснан машкврахъди сабси, гьар йисан 21-пи феврали Бабан чIаларин йигъра къайд апIура.

Дугъриданна, Западди алаури Украинайиъ гъягъюри гъахьи миллетчивалин гьяракатариан рябкъюрайиганси, гъи бабан чIалар хилиъ яракь ади дюбхну ккуни замана дубхьна. Ухьуз багъри баб, ватан ва бабан чIал фици сабси гирами вуш, му кьюбид машкврарра сабси багьалу вухьуз.

«Табасарандин нурар» газатдин редакцияйин терефнаан ихь игит эскрар ва дурарин хизанар, бабан чIалниин лихурайи аьлимар, мялимар ва гьарсар табасаранлу Ватан уьбхрурин йигъахъди ва Бабан чIаларин йигъахъди мубарак апIури, вардариз жандин сагъвал, ислягь уьмур ва аку гележег ккун апIурача.