Мейлан Нежефов

 

1950-пи йисхъанмина вари дюн’яйиъ хьадан садпи йигъ БицIидар уьрхбан йигъ вуди къайд дапIна. Аьхиримжи йисари му йигъаз тялукь вуйи жюрбежюр мяракйир Хив райондиъра кIули гъахура.

 

Ццира, Хив гъулаъ РКДЦ-йин улихь 1-пи июнди гвачIнинган сяаьт 10-диан хябяхъдин 18-диз шадлугънан тамшир тешкил апIиди. БицIи тамашичйириз райондин администрацияйин вакилари ва Мягьячгъалайиан дуфнайи хялари БицIидарин йигъ къайд апIбан тарихнакан, дидин эгьемиятлуваликан ктибтиди. Мидланра савайи, мектебариъ, бицIидарин багъариъ айи марцци малайикари ва артистари чпин ялхъвнариинди ва мяълийириинди тамашичйирик гьевес капIди.
Райондиъ яркьуди БицIидарин йигъ къайд апIуз ДГПУ-йин ректор Нариман Асваровди ва Дербент шагьрин табасаранарин милли культурайин автономияйи кьувват тувра.

БицIирин ихтиярар уьрхювал тямин апIувал инсан ккун хьувалин, дюзвалин ва хушбахтлу жямяаьтлугъ аьмалназ хпан чарасуз шартI ву. 1-пи июнди къайд апIурайи йигъ бицIидариз шаду машкварси, аьхюдариз чпи гьарган бицIидарин гъайгъушнаъ духьну ва дурарихъан жавабдарвал дубхну ккунивал кIваин апIурайи лишан ву. Гьаддиз му йигъан жуван веледар рази ктауз артухъси чарйир зигай. Гъит ихь гьякаларстар бицIидарин уьмриъ гьарсаб йигъ машкварси шадуб, ибшри!