Наргиз Гюлечова

СПИД ва сарикан тмунурикна тарагъру жара уьзрариз аькси вуйи ляхин гъабхурайи республикайин центрин (РЦИБ) статистикайин улупбариинди, Дагъустандиъ СПИД уьзур кайидар йигълан-йигъаз артухъ шула. Эгер цIиб улихьнаси уьзур кайи жиларна хуппар тевиган, тенвал 7 жвина 1 дишагьли вуйиш, гъи 2 жвина 1 дишагьли духьна, яна уьзур киврайи дишагьлийирин кьадар за шула.

 

«ЦIиб улихь вахтари ВИЧ-инфекция кайи инсанарин яшар асас вуди 20 йислан 30 йис’ина вуйиш, гьамус 30 йислан 50 йис’ина яшариъ айи касарин кьадар артухъ ву. Ктабхъурайи йисандин арайиъ 70 йислан 80 йис’ина яшар духьнайидарин арайиъ ВИЧ-уьзрар кивнайи 22 кас ашкар духьна. Дурар вари ихь дагълу касар ву. Хъа 50 йислан 80 йис’ина яшариъ ади уьзур кивдарин кьадар 150-тIан артухъ ву», – ктибтнийи РЦИБ-дин профилактикайин отделин духтир-инфекционист Жамал Ризвановди 8-пи октябри республикайин СМИ-йин вакиларихъди гъабхьи гюрюшдиъ.

Урусатдиъ ВИЧ кайидар варитIан гизаф Сибириъ ва Уралиъ а. СКФО-йин регионариъ аьгьвалат думукьан читинуб даршра, гъийин йигъаз Дагъустандиъ 5 600 ВИЧ-инфекцйир кайи инсанар гьисабназ гъадагъна ва 1500 кас му уьзрин гъийихну. Республикайин муниципалитетарикан улхуруш, варитIан гизаф аьзарлуйир Дербент шагьриъ гьисабназ гъадагъна. Хъасин Дагъустандин Огнийиъ, Буйнагъскдиъ, Каспийскдиъ, Мягьячгъалайиъ ва имбу шагьрариъ.

РЦИБ-дин вакилари му жюрейин уьзрар кайивал фици аьгъю апIурушра, ктибтнийи. Уьзур кубчIвнайи касарин жандин темрература за шулу, ликрилан кIул’ина жандиз утIубччвуру, дурар ипни хьуз хъюгъру.

«Аьхиримжи йисари ВИЧ-инфекция киврайи касарикан 80% жиларна хпар чиб-чпихъди лап багахь аьлакьйириъ учIврайивалиан аьзарлу шула, хъа 20% уьзур ифдихъди тарабгъура», – гъапну Жамал Ризвановди. Дугъу республикайин агьалйирихьан, чпин му темайиан суалар аш, РЦИБ-дин пишекрарихьна, жвуван ччвур ашкар дарапIди, «ГБУ РД «РЦИБ и СПИД» телеграм-каналианмина илтIикIуб ккун гъапIну.