Гюльнара Мягьямедова
Урусатдин Федерацияйин Президент Владимир Путиндин указдиинди хусуси метлеб айи дявдин операция гъабхурайи йишваъ улупу кьягьялвализ, дирбаш’вализ ва чпин жан гьяйиф дарапIувализ дилигну, Табасаран райондин Бухьнагъ гъул’ан вуйи Ринат Пировдиз, ТинитI гъул’ан вуйи старшина Вадим Гьяжибеговдиз ва сержант Аьгьмед Мирзакеримовдиз йикIбан кьяляхъ Кьягьялвалин орденар тувну.
8-пи октябри Табасаран райондин глава Мягьямед Къурбановди гьюкуматдин наградйир гъийиху эскрарин багахьлуйирихьна тувну.
Серенжемдиъ райондин администрацияйин главайин заместитель Ринат Мирзабалаев, райондин главайин диндин месэлйириз лигру теклифчи Надир Зулфикьаров, райондин жямяаьтлугъ палатайин председатель Аьлимирза Гьясанов, агьли касарин советдин председатель Кумалат Кумалатов ва ТинтIаринна Халгъарин гъуларин советарин главйир иштирак гъахьнийи.
Гъийиху эскрарин багахьлуйирихьна илтIикIну, Мягьямед Къурбановди гъапну: «ЧIиви игитариз наградйир тувуз ккундушра, гьяйиф, нубатнан ражнура йикIбан кьяляхъ наградйир туврахьа. Йиз терефнаан дерин пашманвал мялум апIури, учвуз башсагълугъвал ккун апIураза. Ичв баяр, жилар йикIувал саб учвуз ваъ, вари райондиз аьхю хажалатнан ляхин ву. Дурари читин аьгьвалатнаъ чпин жюрэтлувал, игитвал улупну. Ичв баяр гележегдин наслариз кьягьялвалин ва ватанпервервалин гьякьлу чешне ву, дурарин гьюрмат гъуландарин, жара инсанарин кIваъ гьаммишандиз гъубзди.
Ич терефнаан удубкьру кюмек апIуз гьязур вуча, читинвал алабхъиш, гъуларин поселенйирин главйирихьна, СВО-йиъ айидарин месэлйириз лигру йиз заместитель Ринат Мирзабалаевдихьна илтIикIуз шулчвухьан».
Бухьнагъ гъул’ан вуйи Ринат Пиров Ингушетияйиъ, Цхинвалийиъ, кьяляхъна Ставрополин крайиъ контрактдиинди гъуллугъ апIурайи. Дугъу хусуси метлеб айи дявдин операция ккебгъу садпи йигъариланмина Запорожский областдиъ дявдин месэлйир гьял апIури гъахьну. Эскер 2023-пи йисан 16-пи декабриъ гъакIну.
ТинитI гъул’ан вуйи Вадим Гьяжибегов чан хушниинди хусуси метлеб айи дявдин операцияйиз гъушнийи. Думу Донецкдиъ гъахьи дявдин женгарин иштиракчи вуйи. 2023-пи йисан 10-пи ноябриъ душмандин гюллдиан гъакIну.
ТинитI гъул’ан вуйи Аьгьмед Мирзакеримов 2015-пи йисхъанмина Карачаево-Черкессияйиъ контрактдиинди гъуллугънаъ айи. Думу хусуси метлеб айи дявдин операция ккебгъу сабпи йигъариланмина Херсонский ва Запорожский областариъ гъягъюрайи дявдин женгариъ иштирак гъахьну. Душмандин пилот адру тIибхру аппаратдиан йивну, майдин 8-пи йигъан гъакIну.
Хусуси метлеб айи дявдин операцияйиз чан хушниинди гъушу ва зийнар духьну кьяляхъ гъафи Хючна гъулан агьали Низами Мягьямедовдиз Урусатдин Федерацияйин Прези-дентдин указдиинди Суворовдин медаль тувну. Эскрин хилиз медаль муниципалитетдин глава Мягьямед Къурбановди тувну.
9-пи октябри Табасаран райондин глава Мягьямед Къурбановди хусуси метлеб айи дявдин операцияйин иштиракчи Жулжуниф гъул’ан вуйи Мурадхан Аьгьмадхановди гъуллугъ апIурайи частнан командирихьан дугъан адаш Кьасум Аьгьмадхановдихьна гъафи чухсагъулин кагъаз тувну. Думу кагъзиъ гьамци дибикIна: «Яв бай Мурадхан Аьгьмадхановди чан эскервалин буржи намуслувалиинди тамам апIурайиваликан, дявдин гъуллугънан вари читинвалар лайикьлуди кьабул апIурайиваликан дамагълуди ктибтураза, думу чахъди гъуллугънаъ айидариз нумуна ву.
Ватандиз вафалу, намуслу, гьякьлу, зегьметниин юкIв али эскер тербияламиш апIбаз увуз кIваантIан чухсагъул мялум апIураза. Гележегдиъра думу яв гъуллугънаъ гъахьи ва Ватандин лайикьлу ватандаш шул кIури, умуд кивраза. Увуз хизандин хушбахтвал, мюгькам сагъвал ккун апIураза».
Чухсагъулин кагъаз туври, муниципалитетдин главайи Кьасум Аьгьмадхановдиз ва дугъан уьмрин юлдаш Айниса Мягьямедбеговнайиз, Ватандиз вафалу бай тербияламиш апIбаз лигну, чухсагъул мялум гъапIнийи.
