Гюльнара Мягьямедова
2024-пи йисан 17-пи мартдиъ Урусатдин Федерацияйин Президент ктагъбан сечкйириъ сесер тувну ккудубкIнийи. Дагъустан Республикайин Сечкйирин комиссияйи чан заседаниейиъ сесер тувбан натижйир гъивну. Натижйирин гьякьнаан вуйи улупбар, чап апIбан бадали, мялуматарин дакьатариз хътаъну. Учухьна дуфнайи улупбариз асас вуди, 1 425 408 дагъустанлуйири чпин сесер Владимир Путиндихъанди тувну. Сесер тувдарин уьмуми кьадарнакан Путиндин тереф гъибисдарин кьадар Дагъустандиъ 92,12% ву.
Дагъустанлуйири 79 902 сес коммунист Николай Харитоновдихъанди (5,16 %), 23 681 сес ЛДПР-ин кIулиъ айи Леонид Слуцкийихъанди (1,53%) тувну. «ЦIийи инсанар» партияйин вакил Владислав Даванков, 10 284 (0,66%) сес ади, юкьубпи йишв’ина удучIвну.
Учу гизафси табасаранар яшамиш шулайи Дагъустандин Огни шагьриан, Табасаран ва Хив районариан дуфнайи улупбар исихъ туврача.
Табасаран райондиъ сечкйирин 66 комиссияйи сиягьназ вари 34 370 сечкичи гъадагънийи. Думу кьадарнакан гьамусяаьт гьюкмин кIулиъ айи Владимир Путиндихъанди 29 778 касди (93,09%) чпин сесер тувну, Владислав Даванковдихъанди – 138 касди (0,43%), Леонид Слуцкийихъанди – 639 касди (1,99%), Николай Харитоновдихъанди – 1378 касди (4,31%) сесер тувну.
Хив райондиъ сечкйирин 35 комиссияйи сиягьназ сес тувуз ихтияр айи 13189 ватандаш гъадагънийи. Думу кьадарнакан Владимир Путиндихъанди 11 558 касди (93,47%) чпин сесер тувну, Владислав Даванковдихъанди — 88 касди (0,71%), Леонид Слуцкийихъанди – 93 касди (0,75%), Николай Харитоновдихъанди – 606 касди (4,90%) сесер тувну.
Дагъустандин Огни шагьриъ сечкйирин 12 комиссияйи сиягьназ 22 778 ватандаш гъадагънийи. Думу кьадарнакан Владимир Путиндихъанди 18 035 касди (92,13%) чпин сесер тувну, Владислав Даванковдихъанди – 110 касди (0,56%), Леонид Слуцкийихъанди – 242 касди (1,24%), Николай Харитоновдихъанди – 1053 касди (5,38%) сесер тувну.
Къайд апIуб лазим вуки, Урусатдин Федерацияйин Президент ктагъбан сечкйир гъахру вахтна ва дурарин натижйир йивбан кьяляхъ РД-йин Сечкйирин комиссияйиз сечкивалин къанун чIур апIувалин, ясана къайдасузваларин гьякьнаан илтIикIдар гъахьундар.
