Зубайдат Шябанова
Гьаму йигъари Табасаран райондин ЧвулатI гъулаъ Дагъустан Республикайин Верховный суддин судья Къурбан Пашаевдин гьюрматназ бахш вуйи мини-футболин талитар кIули гъухну.
КIваин апIуз ккундузуз: Къурбан Аьлягьмедович Пашаев 2000-пи йислан 2007-пи йисаз РД-йин Верховный суддин судьяди лихури гъахьну. 2007-пи йисан 11-пи декабри думу чан хуларин гъапйирихъ йивну гъакIну.
Футболин талитар Табасаран райондин администрацияйихъди сатIиди Къурбан Пашаевдин багахьлуйири тешкил гъапIнийи. Душваъ райондин жюрбежюр гъулариан 13 команда иштирак гъахьну.
Яриш ачмиш апIбан шадлугънан серенжемдиъ Табасаран райондин администрацияйин главайин заместитель Заур Мусаев, райондин администрацияйин спортдинна туризмдин ляхнарин кIулин пишекар Вадим Рашидов, райондин бицIидариннна живанарин спортдин мектебдин директор Садикь Уьсманов, Къурбан Пашаевдин багахьлуйир ва гъуландар иштирак гъахьнийи.
Футболистарин командйир кьюб йишваз пай гъапIну. Кьюбиб дестйириан варитIан гужли кью-кьюб команда полуфинализ удучIвну. Сабпи полуфиналин талит ЧвулатI ва Урзигъ гъуларин командйирин арайиъ гъабхьну. Матч 1:1 гьисаб ади ккудубкIну, хъа пенальтйир йивбаан Урзигъ гъулан футболистарин команда улихь гьудубчIвну. Полуфиналин кьюбпи уйнамиш Ягъдигъ ва Гурихъ гъуларин командйирин арайиъ гъабхьнийи. Мурарин талитра 2:2 гьисаб ади ккудубкIну ва пенальтйириан Ягъдигъ гъул’ан команда гъалиб гъабхьну.
Шубубпи йишв бадали гъабхьи талитнаъ Гурихъ гъулан командайи 7:1 гьисабниинди ЧвулатI гъулан командайиин гъалибвал гъадабгъну. Ягъдигъ ва Урзигъ гъуларин командйирин арайиъ гъабхьи финал гъизгъин женгнаъ гъубшнийи. Ягъдигъарин жигьиларин команда гьелелиг сарихьанра ккабгъуз гъабхьундар. Гьаму ражарира талит 2:0 гьисаб ади ккудукIну. Гьаци, яришдиъ сабпи йишв Ягъдигъ, кьюбпи йишв – Урзигъ, шубубпи йишв – Гурихъ гъуларин командйири гъазанмиш гъапIну.
Яришдин тешкилатчйири гъалибчйир ва пешкешнан йишвар гъадагъдар кубокдиинди, медалариинди, дипломариинди ва жара пешкешариинди лишанлу гъапIну.
Къурбан Пашаевдин багахьлу Заур Амираслановди вари командйириз иштирак хьувализ ва маракьлу талитар гъахбаз чухсагъул мялум гъапIну ва Къурбан Пашаевдин гьюрматназ вуйи талитар гьар йисан гъахуб аьдатнаъ ипуз планламиш дапIнайиваликан гъапну.
Талитарин кьяляхъ ич сюгьбатнаъ Табасаран райондин ДЮСШ-йин директор Садикь Уьсмановди къайд гъапIганси, спортдин талитари аргъаж шулайи наслиз ужуб тербия тувра.
«Мисалназ, гьаму талитар хайлин живанари аьхю аьшкьниинди кьабул гъапIнийи. Райондин футболин ужударстар командйирин талитар гъахбан бажаранвализ, тактикайиз ва ишлетмиш апIуз дархьи мумкинвалариз фикир туври, дурариз чпизра ужуб тажрубайин дарсар шулу, гьацдар серенжемариъ, турнирариъ иштирак хьуз живанарин гьевес за шулу. Кьюб кIуруб, ухьу ихь баярин сагъвал бадали талитар гъахбиинди, халкьдин арайиъ дурарихьна вуйи гьюрматра уьбхюрахьа. Къурбан Пашаев, дугъриданна, табасаран халкьдин лайикьлу бай гъахьну. Гьадму гъагъи йисари, районарин, гъуларин главйир, дилаварчйир чпи уьрхру кью-кьюр, шу-шубур гъаравул хъади лицурайи вахтари, думу сарди, сабдихьанра ва сарихьанра гудручIри лицуйи. Гьадди дугъан марццивал, дугъривал ва гьякьлувал улупура. Хъа угърашариз дирбаш инсанар ккундар. Дурари Пашаевстар игитариз хабарсузди, йирфариз йивуру.
Талитариъ Урзигъ, СиртIич, Ярса, ТIюрягъ ва хайлин гъуларин командйир иштирак гъахьну. Дурар финализ удучIвундаршра, варидари маракьлу уйнамишар гъухнийи. Ягъдигъарин футболистарин жигьил командайин дахилнаъ ич мектебдиъ урхури гъахьи баярра а. Узу дурари гъубху маракьлу талитариин лап шад духьназа», – аьлава гъапIнийи ич сюгьбатнаъ Садикь Уьсмановди.
