Мейлан Нежефов
Хив райондин 90 йисандин юбилейихьна гъахурайи гьязурлугвар ахтармиш апIури, райондин кIулиъ айи Ярмет Ярметов гъулан поселенйирилан илдицура. Кадабхъурайи гьяфтайи думу Мажвгулна хялижв гъахьнийи. Сифте гъулан администрацияйин гьяятдиъ ерлешмиш дубхьнайи бицIидарин майдандилан, хъасин, гъулан бицIидарин багъдилан, культурайин хуллан, библиотекайилан, мектебдилан, ФАП-дин, халачйирин фабрикайин идарйирилан ул илтIибкIури, дугъу гьарсаб тешкилатдин гъарашугъарихъди сюгьбат гъубхнийи.
КIули гъуху ахтармишарин натижйир йивури, Ярмет Ярметовди гъулан администрацияйин идарайиъ Мажвгул ляхник кайи идарйирин гъуллугъчйириз, дурари апIурайи ляхниз лигну, чухсагъул гъапнийи. «Мажвгларин гъул ихь райондин аьхю гъуларикан саб ву. Саки вари идарйирин гъарашугъарин ва гъулан агьалйирин арайиъ айи гьюрматназ учвуз баракаллагь кIураза. Гьелбетда, нукьсанваларра адарди дар. Мисалназ, йигъан сабан бицIидариз майдан тикмиш апIуз шлуб дар. Душваъ дивнайи чIюрх-чIувал абхьру кьутйир, деъру кьасйир, яртру жуккмар пуч апIру кьувват набалугъариз адар. Думу нягьякь ляхнар апIурайидар аьхюдар ву. Райондин улихь гъи узу хьаш, закур жарар хьиди. Фунурира апIурайиб халкь бадали апIурайиб ву. Гьаддиз ихь агьалйирикан, гъапIубдиз кьимат тувну, думу уьбхюб ккун апIураза», – гъапнийи Ярметовди.
Чаз гъяркъю нукьсанвалар ктухуб давам апIури, Ярмет Ярметов Мажвгларин гъулаз регьбервал туврайи Агъаверди Жалиловдихьна илтIикIнийи ва дугъкан ФАП убхъру штухъди тямин апIуб, бицIидарин багъдин икризди учIвру йишвахь жяргъял ккабхьуб, амсишнар хьайиз гъулан кючйирин рякъяриин гъахурайи ляхнар ккудукIуб ккун гъапIнийи. «Аьгъязуз, жямяаьтдин кюмек адарди, сар главайихьан фукIа апIуз шулдар. Хъа главайи, жямяаьтдихъан юкIв убгури, ляхин апIуруш, умудлуди кIураза, жямяаьтра дугъаз бакар шулу, учвра мажвгларин жямяаьт. Ичв администрацияйин кевшенариин йицIубдихьна гъван адабгъру йишвар ал. Рякъ-хулиз гъван герек ву гъапиш, йиз фикриан, думу карьерарин эйсйирикан сарира ваъ даркIур. Гьаци меценатвалин ва рягьимлувалин кюмекнан хил гьачIабккру агьалйирра гъи ичв гъулаъ цIиб адар. Гьациб кьувват райондиан тувуз учура гьязур вуча», – гъапнийи Ярмет Ярметовди.
Мажвгул гъулан бицIидарин багъдиъ лихурайи тербиячйири, Ярмет Ярметов чпихьна гъафиган, бицIидариз тамшир апIуз саб фукIара адрубдикан ктибтнийи, ва главайи думу месэла гьял апIуз гаф тувнийи.
Чпин тIалабар хьади райондин кIулиъ айирихьна гъулан агьалйирра илтIикIнийи. Мектебдин завуч ва жямяаьтлугъ кас Мейлан Нежефовди мектебдиз ва бицIидарин багъдиз Хив гъулан тукандиан хурайи сурсат, миди вуйи туканарианси дарди, кьюб ражари багьади туврайиваликан ва думу сурсат ишлетмиш’валин вахт ккудубкIурайиб, варитIан кIан’ин гъубзнайиб, жвиллиб вуйиваликан ктибтнийи. «Ярхла гъул ву кIури, сурсатарра вазли сабантIан хурадарчухьна. Магьа, гъадагъиш, картфар, дурарикан, дутIнайи йишвар ктIатIиган, фукIа гъубзудар», – гъапнийи дугъу.
Райондин главайи дишлади Хивна тукандиз зенг гъапнийи ва туканчийиз тюнбюгь тувну, сарун мициб дюшюш давам гъабхьиш, жараси улхидихьа гъапнийи.
Агьли Тураб Турабовди Ярмет Ярметовдиз гъулан варитIан тлихъан мягьлайиз гъябгъюрайи рякъ мархьари пуч дапIнайиваликан хабар тувнийи. «Мягьлайиъ сумчIурилан зиина хизанар яшамиш шула. Гьарсаб хизандихъ машин хъа. Гьяйифки, рякъ гизаф пуч дубхьнайивалиан сарихьанра машин чан раккнихъна хъапIуз шули адар. Хъа гьавйир амсишнарихьинди илтIикIган, ликрикьан гъягъюз шулдарчухьан. Абхьру йишвахьна хяхял хуз, цалар ккаъру йишвахьна гъванариз, цементдиз, гъумраз увхьан учуз пулин дакьатарин кюмек гъабхьнийиш, ляхин чIанади апIуз мягьлайиндар рази вуйча, аьхюр», – гъапнийи агьли касди.
Рякъ саб мягьлайинуб даруб субут апIури, главайи расвалин ляхнариз райондин бюджетдиан пул деебтуз гаф тувнийи.
Украинайиъ хусуси метлеб айи дявдин операцияйиъ кьюр бай иштирак шулайи Мурсяли Ибрагьимовди гъулаъ бализ тазади диврайи хуларихъна электрикдин ток зигуз главайикан кюмек ккун гъапIнийи.
«Мобилизацияйин дахилнаъди духнайи бализ гъулан гъирагъдихъ, «бисми» дапIну, хулар ккергънача. Магьа устйир, подвларра ккудукIну, опаловкара хъивну, арматура алабхьну, бетон убзуз ккунди ток зигайиз ккилигура. Миж кивраза, увкан му ляхниз кюмек шул пну», – тIалаб гъапIнийи эскрарин адашди.
«ИкибаштIан. Ихь райондиъ СВО-йин иштиракчйириз ва дурарин абйир-бабариз, хизанариз алахьурайи читинвалариз кюмек апIуб аьдатнаъ абхъна. Гьаму йигъари кабель ва шалмнар хьади узу хуларихъна ток зигуз электросетдиан техникара хьади баяр гьаъдиза. Хъа суфрайин гьякьнаан увура дурарин хатур миккибтан ва мажвгларин аьдат чIур мапIан», – зарафат гъапIнийи главайи.
«Юлдшар, СВО-йин гьякьнаан улхури имиди пуз ккундузуз. Гъи Мажвгларин гъул’ан варждихьна баяр, вафалувалиинди ватандиз гъуллугъ апIури, дявдин цIигъ гъя. Гьар йигъан дурарин ччвурнахъ гъюрайи медалари ва чухсагъул мялум апIбан кагъзари дамагъ капIразук. Гьяйифки, жюрэтлувал улупури, дурарикан йирхьур кас уьмриан гъушну. Миди вуйидариз Аллагь кюмек ишри. Ватандиз жан гъурбан апIру ватанперверар тербияламиш гъапIу учвузра баракаллагь», – илтIикIнийи райондин кIулиъ айир мажвгларихьна.
Ярмет Ярметовди СВО-йин иштиракчи Камил Къалабеговдин «Дагъустандин халкьдин Игит» кIуру медаль балин адаш Демирбег Къалабеговдихьна гъурубкьнийи.
Гюрюшдин аьхириъ райондин главайи бицIидарихъди ва гъулан агьалйирихъди шикларра гъивнийи.
