Гюльнара Мягьямедова

81 йис улихьна, 1943-пи йисан 9-пи октябри Советарин кьушмари Кавказ бадали вуйи женгариъ гъалибвал гъадабгънийи.

 

1942-пи йисан 25-пи июли ккебгъу женг 1943-пи йисан 9-пи октябриз – 442-пи йигъан – давам гъабхьнийи. Думу женгну учв давам гъабхьи вахтниинди, Ленинград бадали 900 йигъан давам гъабхьи женгнан кьяляхъ кьюбпи йишв дибисна. 14 вазлин арайиъ Кавказдин дагълу, яркврари дидиснайи жилариин дявдин гъагъи женгар кIули гъушнийи.
Кафари Кавказ, хъа гизафси нафт адабгъру районар дисуз ккуни Гитлерин планар лап гъагъи женгариъ ихь эскрари батIул гъапIнийи.

Думу женгариъ варж агъзрариинди дагъустанлуйири дирбаш асланарси женг гъубхну, далу терефнаъ айи зегьметкешари фронт яракьдихъди, ипIрубдихъди тямин апIури, гъалибвалик лайикьлу пай кивну. Дурарин арайиъ Советарин Союздин Игитар – АхцIигь райондин Ахцигь гъулан вакил, дявдин летчик Валентин Эмиров, Рутул райондин Хнов гъулан вакил Гьясрет Аьлиев, Ахъуша райондин Муги гъулан вакил Сумен Къурбанов а. Дурари Кавказ бадали вуйи женгариъ гьунарар улупну.

1942-пи йисан августдин вазли фашистарихъди женг гъабхбан бадали Уьру пайдгъин стрелковый дивизия ва Моздокдихъан Берлиндизкьан женгнан машгьур рякъ ккадапIу Дагъустандин кавалерияйин эскадрон тешкил гъапIнийи.
Сергей Меликовди швнуб-саб ражари къайд гъапIганси, думу йисарин гьядисйир гъийин деврин гьядисйирихь тевуз шулу: гъира ихь эскрари яракь хилиъди кIул за дапIнайи миллетчйирихъди женг гъабхура, багъри ругар ва уьлкейин гележег уьбхюра.