Зубайдат Шябанова
Гьаму йигъари Хив райондин Мажвгул гъулан А. Багъдаевдин ччвурнахъ хъайи мектебдин аьтрафариин хусуси метлеб айи дявдин операцияйиъ кечмиш гъахьи эскрарин гьюрматназ КIваин уьрхбан багъ ибтну. Хусуси метлеб айи дявдин операция ккебгъу йигъланмина гъийин йигъаз думу дявдин женгариъ Мажвгларин кьялан мектебдиъ урхури гъахьи 14 жигьил игитарси кечмиш гъахьну. Дурар вари Кьягьялвалин ордендин сагьибар ву.
Игитарин гьюрмат уьбхюри багъ ибтувалихъди аьлакьалу серенжемдиъ Дагъустандин дишагьлийирин Советдин председатель Интизар Мамутаева, Хив райондин жямяаьтлугъ палатайин кIулиъ айи Айдабег Мазов, Хив райондин культурайин, спортдин, жигьиларин политикайин ва туризмдин отделин кIулиъ айи Казбек Къазиев, Хив райондин дишагьлийирин советдин регьбер Зумрия Сеидягьмедова, Мажвгул гъулан агьалйир, кечмиш гъахьи игитарин багахьлуйир иштирак гъахьну.
Гъулан игитариз багъ ибтбан жягьтлувал ва дидиз тялукь серенжем тешкил гъапIдар Мажвгул гъулан мектебдин директор Анвер Хидиров ва тербияйин ляхниан директорин заместитель, райондин собраниейин депутат Мейлан Нежефов вуйи.
Серенжем Урусатдин ва Дагъустандин пайдгъар за апIбалан ва гимн йивбалан ккебгънийи. Дидин кьяляхъ мектебдин цалик хусуси метлеб айи дявдин операцияйиъ кечмиш гъахьи эскрариз – гранатометчикдин кюмекчи Физули Фейтуллаевдиз ва бицIину сержант Исабег Ягь’яевдиз – мармардашдин тахтйир ачмиш гъапIну.
Кюкйир дивбан кьяляхъ Интизар Мамутаева игит эскрарин бабарихьна илтIикIнийи.
«Бабан юкIв сабдихьра тевуз даршлу хусусивалиинди тафавутлу шулайи гьендем ву. Думу варибдин гъавриъ шулу, дугъу вари кьатI’иди кьабул апIуру. Ичв рягьимлу юкIвариз ва Ватандин халис игитар тербияламиш апIбаз аферин, гьюрматлу бабар», – гъапнийи Интизар Мамутаевайи ва хусуси метлеб айи дявдин операцияйиъ гъийиху эскрарин бабар Герекмез Фейтуллаева, Наизат Къалабегова ва Муфизат Эфендиева «Ватан уьбхюрайирин дадайин машгьурвал» медалиинди лишанлу гъапIну.
Мектебдиъ урхурайидари уч духьнайи хялариз Ватандин Аьхю дявдиъ иштирак гъахьи чпин гъулан ветеранарикан ва гъи хусуси метлеб айи дявдин операцияйиъ иштирак шулайи игитарикан ктибтну.
Серенжемдин аьхириъ кечмиш гъахьи игитарин ччвурнахъ йимишарин гъелемар кивну.
