Наргиз Гюлечова
19-пи ноябри Республикайин чапханайин хулаъ «Яв гьунар кIваълан гьархидар…» ччвур тувну, бицIидариз вуйи «Люкьран чирккв» журналин живан мухбирари тешкил дапIнайи серенжем кIули гъубшну. Думу мярака Ватандин Аьхю дявдин Гъалибвалин 80 йисаз ва Ватан уьбхру эскрин йисаз бахш дапIнайиб вуйи.

Серенжемдиз хусуси метлеб айи дявдин опрерацияйин иштиракчйир, военный корреспондентар ва хъанара хайлин жара касар дуфнайи.
«Яв гьунар кIваълан гьархидар…» мярака гъийиху эскрарин гьюрмат уьбхюри, саб дакьикьайиъ ккебехъну дийигъбалан ккебгъну.
Иштиракчйир къаршуламиш апIури, сягьнайиина РД-йин чап апIбаринна мялуматарин агентствойин кIулиъ айирин сарпи заместитель Рустам Жалаков удучIвну гъулхнийи. Дугъу гьамясяаьт уьлкейиъ айи аьгьвалатнакан ва Ватан бадали хусуси метлеб айи дявдин операцияйиъ иштирак шулайи касари апIурайи гьунарарикан гъапну ва аргъаж шулайи насил ватанпересар вуди тербияламиш апIуб ккун гъапIну.

Серенжемдин варитIан асасуб мина уч духьнайи баяр-шубари, Ватандин Аьхю дявдиъси, гъийин йигъан хусуси метлеб айи дявдин операцияйиъ чпин жанар туву эскрариз бахш вуйи шиърар урхуб вуйи. Гьацира РГВК «Дагъустан» телеканалин корреспондент Изафет Эзберовайин авторваликкди гьязур гъапIу фильмра улупнийи. Думу фильм армияйиан гъафи бай мобилизацияйиинди хусуси метлеб айи дявдин операцияйиз гъуххъан, хулаъ кидрисрайи дугъан дадара гьадина гъягъбакан, бай йикIбан кьяляхъра учв жара баяриз кюмек апIури душваъ гъузу дагълу дишагьлийикан вуйи.
Серенжемдин аьхириъ, хусуси метлеб айи дявдин операцияйиъ ляхин апIури гъахьи журналистар пешкешариинди лишанлу гъапIнийи.