Мейлан Н ежефов
Улихьна йигъари Мягьячгъалайиъ «Хизандин команда» кIуру спортдин фестиваль кIули гъубшнийи. Дидин тешкилатчйир «Сарпидарин гьяракат» жямяаьтлугъ тешкилат, республикайин физкультурайинна спортдин министерство ва жигьиларин ляхнариз лигру министерство вуйи.
Хизанарин арайиъ вуйи фестивалиъ Дагъустандин 10 шагьриан ва 23 райондиан 256 кас иштирак гъахьнийи. Талитарин программайиъ вахтназ вуди гъагъ за апIуб, граната ва рукьан туп манзилназ гатIабхьуб, тIилиз зигуб, йишвлан гатархьувал, жюрбежюр манзилариз жаргъуб улупнайи.
60 метр жаргъбаан 1-пи йишв Хив райондин Хирижв гъул’ан вуйи уьмрин юлдшар Маркс ва Зульфия Гюлмягьямедовари ва дурарин хтул (Марксдин чуччун бай) Руслан Рамазановди гъадабгънийи.
Му талитариъ иштирак хьуз чпиз фици кьисмат гъабхьнуш, узуз Маркс Гюлмягьямедовди ктибтнийи.
Хизанарин арайиъ вуйи спортдин фестивалиъ Хив райондин терефнаан учу иштирак гъахьнийча. Фукьан вушра ужуб гьязурлугвал айи талитар гъахьнийи. Узура, йиз уьмрин юлдашра гьарган спортдин гъаразнаъ айидарин терефкрар вуча. Фестивалиъ саки спортдин вари тамшириъ иштирак гъахьунча. Хъа 60 метр варитIан чкиди гъажаргъдарра учу вуйча. Зульфияйи улупнайи манзил 10 секундайин арайиъ ккадапIнийи, узу 8 – секундайиъ, хъа Рамазну 7 секундайин вахтна. Ич шубридарин уртахъ натижа хизанарин командйирин арайиъ варитIан заануб гъабхьнийи.
– Яв гафариан мялум шулазузки, ичв хизан гьарган спортдин гъаразнаъ а. Фици му ляхнихьна гъафунчва?
– Ихь райондин спортдин мектебдиз дахил шулайи Хирижв гъулан спортзалиъ тренерди лихури, магьа 23 йис вуйиз. Саки вари гьаму вахтна узу ва узухь аьгъювалар гъадагъурайи жигьилари ихь райондиъси, гъунши районариъ ва республикайин дережайин талитариъ иштирак шули, варжар’инди пешкешнан йишвар гъазанмиш дапIнача. Гъира, йиз яшариз дилигди, гъазанмиш дапIнайи йишвариинди архаин духьну гъузрадарза. Гьаму йигъари, йиз яш агъсакълинубсиб вушра, юкIв жигьилинубсиб вуйиб сабсан ражну субут гъапIунза (аьлхъюри).
– Аргъаж шулайи наслиз фициб насигьят тувуз ккундувуз?
– Сифтена-сифте чип’ин хъугъвал апIуб. Гьяйифки, гьамусдин жигьиларин жвуван кьувватариин хъугъвал гизаф кьит дубхьна. Саб спортдихьна ваъ, хъа варибдихьна вуйи янашмиш’вал гьациб ву. Удукьударзуан, вая думу йизуб дар пуб варитIан рягьят ляхин ву. Хъа улихь метлеб дивну, гьаддихьна аьшкь кади ва юкIв хъади гамар алдагъиш, хъугъай, завун аьршариз удучIвуз шлу рякъяр гъи ачухъди вухьуз, дустар.
