Зубайдат Шябанова

Гьаму йигъари Урусатдин регионариъ жигьиларин политика-йин артмиш’валин программйириан «Жигьиларин регион» кIуру ччвур али вариурусатдин конкурс кIули гъубшну. Душваъ Дагъустандиан 4 проектди заан йишвар гъадагъну. Дурарин арайиъ Табасаран райондин жигьиларин центрин вакилари гьязур гъапIу проектра а.
Дидин гьякьнаан Табасаран райондин кIулиъ айи Мягьямед Къурбановди администрацияйин аппаратдин совещаниейиъ къайд гъапIганси, райондин жигьиларин центриз проект уьмриз кечирмиш апIуз федеральный бюджетдиан субсидйир жара апIиди.

Табасаран райондин жигьиларин центрин директор Руслан Керимовди ич сюгьбатнаъ гъапиганси, проект гьязур апIбиин идарайин вари коллектив лихури гъахьну. Думу гьязур апIбаъ райондин администрацияйира кюмек гъапIнийи.

«Урусатдин конкурсдиз, вари уьлкейинси, Дагъустандин вари районарин ва шагьрарин жигьиларин центрари чпин проектар хътаънийи. Ихь республикайиан Мягьячгъала ва Дербент шагьрарин, Табасаран ва СтIал Сулейман районарин жигьиларин центрарин проектартIан гъалиб гъахьундар. Му проектариз жара гъапIу федеральный дакьатар жигьиларин центрар цIийи алауз, дурар девриз тялукь техникайихъди ва алатарихъди тямин апIуз, жигьиларихъди серенжемар, форумар гъахуз, цIийи проектар тартиб апIуз харж апIиди. Мидланра савайи, уьлкейин вари жигьиларин центрарин дараматар ва кабинетар Росмолодеждин саб кIалибназ хиди», – гъапну Руслан Керимовди.
Мягьямед Къурбановди думу проект гележегдиъ уьмриз кечирмиш апIбаъ кюмек тувуз чан заместитель Заур Мусаевдиз табшурмиш гъапIну.