Зубайдат Шябанова
Табасаран райондин ЧвулатI гъулаъ 3-пи сентябри, терроризмдихъди женг гъабхбаъ сабвал улупру йигъан, СВО-йиъ игитси кечмиш гъахьи Жамал Сюгьбетовдин ччвур саб кючейиин иливувалихъди аьлакьалу серенжемар гъахьну.
Серенжемдиъ муниципалитетдин администрацияйин вакилар, гъулан жямяаьт, хусуси метлеб айи операция гъябгъюрайи йишвариан жикъи отпускдиз хизанариин улукьуз дуфнайи эскрар, ЧвулатI гъулан мектебдиъ урхурайидар иштирак гъахьну.
Сержант Жамал Сюгьбетов РФ-дин Яракьлу кьувватарин жергйириъ военный контрактдиинди гъуллугъ апIурайи. Думу мотострелковый ротайин взводдин командирин заместитель вуйи.
2023-пи йисан 20-пи майди, гъизгъин женгарикан сабдиъ, зийнар духьнайи дявдин юлдшар гюллйир дяргъру далдайиккинди гъахурайи вахтна Жамалик гюллйир куркIру. Хьуд йигълан, гъагъи зийнариан ихь игит кечмиш шулу.
Урусат Федерацияйин Прези-дентдин къарариинди ватандин маракьар уьрхбаъ дугъу улупу дирбаш’вализ, гьунарариз ва фидакарвализ лигну, Жамал Сюгьбетов Кьягьялвалин орден тувбиинди лишанлу гъапIну.
Табасаран райондин главайин ччвурнахъан серенжемдиъ дугъан заместитель Ринат Мирзабалаев удучIвну гъулхнийи. Дугъу къайд гъапIганси, Жамал Сюгьбетов ватандин вафалу игит бай ву. Дугъу багъри ватан уьбхюри, чан жан фида гъапIну.
«Ихь игит гьаммишан кIваин уьрхюб ва, гьацдар кьягьяларин гьунарар улупури, жигьил насил тербияламиш апIуб ихь буржи ву. Ватандин кьягьял эскер, дугъри ватанпервер тербияламиш гъапIу абйир-бабариз чухсагъул мялум апIураза. Жамалстар игит баяр гъи вари дюн’яйиъ деврин къурху дубхьнайи терроризмдихъди ва неонацизмдихъди женгнаъ а», – гъапнийи Ринат Мирзабалаевди.
Ич сюгьбатнаъ ЧвулатI гъулан глава Герейхан Мирзахановди къайд гъапIганси, ЧвултIан хусуси метлеб айи операцияйиъ 31 жигьил иштирак шула. Гьадрарикан сар Жамал Сюгьбетов вуйи.
«Жамал 2023-пи йисан 25-пи майди уьмриан гъушну. Дюзди гъапиш, Жамал кечмиш гъахьиган, дугъан ччвур гъулан мектебдиин иливуз теклиф дивбан фикир гъабхьнийиз. Хъа гъулан жямяаьтдихъди, райондин глава Мягьямед Къурбановдихъди сюгьбатар апIбан кьяляхъ, сатIиди саб фикрихъна гъафунча. Гъулан саб кючейиин игит эскрин ччвур иливбан ният варидариз кьабул гъабхьну.
Жамал ЧвулатI бабкан гъахьну ва гьамушваъ дугъу мектеб ккудубкIну. Думу, бицIи вахтнаанмина ужуб хасиятнанур, жарариз гьаммишан кюмекназ гъюрур, гьюрмат кайир, хизандин бай вуйи. Жамал хизандин аьдатар, халкьдин багьалу савкьатар, ягь-намус уьбхрур вуйи. Дугъ’инди вари ич гъулан жямяаьтди дамагъ апIура.
Дугъаз кьюр бай а. Жамалин хизан ва абйир-бабар Мягьячгъала шагьриъ яшамиш шула. Гъит дурариз ярхи уьмур ва мюгькам сагъвал туври», – гъапнийи Герейхан Мирзахановди.
