Ич жигьил вахтари палахкьарин Юсуф мяракайин юкIв вуйи. Мугъан дерин гафар ва мягьмари сес варидариз кабалгуйи.
1962-пи йисан чвну, Жалалдихьан кьюб гьяштира гъадагъну, 6-7 кас мялим Шябнан хулаз уч духьнайча. ХинкIар гьязур шулайиган, Юсуфдизра гъач пуз Шябнан гъунши гьаъча. Ургъаз сумчриз гъушу Юсуф дуфнадар кIури, гъунши кьяляхь гъафи.
Амма ич арайиан сарди гъапи, Ургъ’ан гъюрайи Юсуф чаз гъяркъюнзуз кIури. Рюмкйирин кьяляхъ гьевеслу гъахьи жигьилариз ашукь Юсуф суфрайихъна хуз зурба аьшкь гъабши. Гьамци, кьюр кас Юсуфдин гьяятдиз гъушу. Хайлин дихар гъапIнушра, хул’ан жаваб гъабхьундар. Гьяятдиъ, гимбар кчIюркьюри, цIа кабхьругандиз гьязур апIурайи гъурарин кунцIар айи. Кефи кайи жигьилари саб кунцIрак цIа кипу. Амма хул’ан удучIвур гъахьундар. Дугъриданна Юсуф хулаъ адаршул кIури, цIара кутIубшвну, жигьилар суфрайихъна гъафи. Мурар гъюруш, хулаъ Юсуфрин сес атIабгна – Шябназ Юсуфрин мяълийир кайи касета ади гъабхьну …
Хъа йигъан узу мектебдиз гъягъруган, гумихьна хъуркьу Юсуфди, гъуландариз, сан чан хуларик цIа кипуз хъюгьну кIури, аьрза апIура. Хъа фужар вуш, фу вахт вуш, мугъу кIури адар. Юсуф кьадарсуз ултIурччвурайиган, узура гъапиза: «Дуст кас Юсуф! Уву радиойихъан «ГъуштIилна гьач!» кIури мяълийир апIруган, жара гъулариан гъафи жигьиларин дестйир кьабул гъапIунва, хъа сан яв багъри гъуландарихьна удучIвундарва. Уву удучIвур кIури гьяятди дийигънайидари, чпиз манира апIарча кIури, кипуншул саб бицIи гъурарин кунцIрак цIа. Хъа уву хуларик цIа кипуз хъюгънийиз кIурава. Уву мици улхуруш, йиз шиърарикан мяълийир дюзмиш мапIан. Бязи мяълийирик уву йиз гафар дигишра апIурава. Хъа авторин гафар дигиш апIуз ихтияр айиб дар».
Йиз гафари тясир туву Юсуфди: «Ибшри гъулажви! Ибшри! Дугъри гъапиш, бизар духьнайи узу нивкIуз душну, учву гъафибкьан аьгъдариз. Му ляхин узуз гвачIнинган аьян гъапIур йиз хпир ву», – гъапи. Хъа узура, Юсуф шад апIуз ккунди, саб бенд албагза:
«Ебхьруган яв мяълийин сес,
Ачухъ шулу жандин гьевес.
Багьа вува учуз гьарган,
Ккилигури зат мигъитан».
Гьамци, учлан сандин аьйиб алдапIну, Юсуфдин аьрзар-фарзарра яваш гъапIза.
