Гюльнара Мягьямедова

12-пи мартди мялум гъабхьиганси, Ленинграддин цIийи военный округдин командующийин заместителди Хив райондин вакил, Урусатдин Игит, генерал-лейтенант Эседулла Абачев дерккну. КIваина хурача: Ленинграддин военный округ 2024-пи йисан 26-пи феврали Президент Владимир Путиндин Урусат военно-административный йишвариз пай апIбан гьякьнаан вуйи Указдиз асас вуди арайиз гъафиб вуйи. Думу округдин дахилназ Карелия ва Коми республикйир, Ленинграддин, Архангельскдин, Вологдайин, Калининграддин, Мурманскдин, Новгороддин ва Псковдин областар, Ненецкий автономный округ (НАО) ва Санкт-Петербург гъадагъну. Гьацира цIийиди арайиз гъафи округдиз Кафари флотра тувну. Военный цIийи округ уьлкейин кIулиъ айидари НАТО-йи чан дахилназ Финляндия ва Швеция гъадагъбаз жаваб вуди тешкил гъапIуб ву.

Эседулла Абачевдиз «Урусатдин Игит» ччвур 2022-пи йисан Луганскдин Халкьдин Республикайин Лисичанск шагьур Украинайин миллетчйирихьан азад апIбахъди аьлакьалуди тувуб вуйи. Думуган Э. Абачевди Кьибла военный округдин миржибпи армияйин командующийин заместителди гъуллугъ апIурайи. ЦIиб вахт ккудубшбан кьяляхъ Эседулла Абачев ЛНР-ин Халкьдин милицияйин армейский 2-пи корпусдин командующийди тяйин гъапIнийи, 2023-пи йисан майдин вазли думу Ригъ алабхъру терефнан военный округдин кьушмарин командующийин заместителди, хъа йисан аьхириъ Гьюкуматдин сяргьятар уьрхюрайи дестейин командующийди тяйин гъапIнийи. 15-пи январиъ Урусатдин Президентдин Указдиинди Эседулла Абачевдиз Кьягьялвалин кьюбпи орден тувну. КIваина хурача, сабпи Кьягьялвалин орден дугъаз Сирияйиъ дявдин женгариъ иштирак хьувализ дилигну тувнийи. Думу гьацира «Женгариъ лишанлу хьувализ» орден, «Ватандин улихь лишанлу хьувализ» сабпи ва кьюбпи дережайин ордендин медаларин, «Дирбаш’вализ», «Дявдин гъуллугънаъ лишанлу хьувализ» кьюбпи дережайин, «Женгариъ дуствал уьбхбаз» (Сирия), Урусатдин оборонайин министерствойин медаларин сагьиб ву.