Наргиз Гюлечова

30-пи январиан 1-пи феврализ Москва шагьрин ВДНХ-йиъ, Урусатдин Президент Владимир Путинра иштирак духьну, «Сарпидарин гьяракатнан» II съезд кIули гъубшну. Дидин ляхниъ Урусатдин 89 региондиан 3 агъзуртIан артухъ баяр-шубар иштираквал гъапIну. Гьадрарин арайиъ Дагъустандианра 15 делегат айи.

Съезддиъ гьяракатнан иштиракчйирин яшарин кьадар 25 йис’ина за апIбан мясляаьт адабгънийи.
Гъи ихь республикайиъ айи баяр-шубарин кьадар 143 агъзур ву. Дурарикан 6 йислан 25 йис’ина яшар вуйидариз, гьадму гьисабнаан студентаризра, цIийи жигьиларин жямяаьтлугъ тешкилатдин вакилархьуз мумкинвал гъабхьну.

«Сарпидарин гьяракатну» чан ляхин 12 цирклиъди кIули гъабхура. Дидин иштиракчйирихьан чпин кIваз хуш вуйи тереф кадабгъну, ляхин апIуз, жюрбежюр проектариъ, конкурсариъ иштирак хьуз, артухъди аьгъювалар гъадагъуз шулу.
«Гъийин йигъаз республикайин муниципалитетариъ му гьяракатнан 43 ерли отделенйир ачмиш дапIна. 4 райондиъ ктарди, имбуну вари муниципалитетариан баяр-шубар му тешкилатдиъ лап аьшкьниинди иштирак шула», – гъапну «Сарпидарин гьяракатнан» Дагъустандин отделениейин кIулиъ айи Людмила Сяидовайи.

Къайд апIуб лазим вуки, 7-пи феврали «Сарпидарин гьяракатнан» II съезддин натижйириз бахш дапIнайи пресс-конференцияйиъ Каспийск шагьриан вуйи гизаф бицIидар айи Гъазанбеговарин хизандиз Урусатдин регионариъ сейир апIуз ихтияр туврайи сертификат багъиш гъапIну.