Зубайдат Шябанова
21-пи апрели Дагъустандиъ 2500-тIан артухъ иштиракчйир айи махлукьалту жаргъбаан «Dagestan Wild Trail» талитар гъягъиди. Жаргъбарин маршрут республикайин швнуб-саб райондиантина хьибди. Вари манзиларин аьхир УнцIукIул райондин Шамилгъала поселокдиъ хьибди.
Программайиъ жаргъбарин кьяляхъ мастер-классар, «Дагъустан» ансамблин концерт ва бицIидариз шадлугънан серенжемар хьиди. Талитар РД-йин туризмдин ва халкьдин сяняаьткарвалин министерствойи Москвайин «WILD TRAIL» компанияйихъди сатIиди тешкил апIура.
Му талитарин гьякьнаан чан фикрар ачухъ апIуб ккун апIури, узу Дагъустандиъ жаргъбарин спортдин хайлин ражари чемпион, Табасаран райондин ТинитI гъулан вакил Максим Дадашевдихьна илтIикIунза.
Къайд апIуз ккундузуз, гъябгъюрайи йисан мартдин вазли дагъдин машнаканзина кIулиз 5 километр жаргъбаан Вариурусатдин талитариъ Максим Дадашевди 3-пи йишв гъибисну. Дагъустандиъ жаргъбариан вуйи вари талитариъ думу жанлу иштиракчи ва саки гьар ражари чемпион шула. Гьаму ражари гъягъру нубатнан талитарикан улхури, дугъу гьамци гъапну:
«Дагъустандиъ йиз иштираквал адарди жаргъбариан саб талитра гъябгъюри шулдар. Гьаму ражари талитариъ узура, йиз риш Миланара, бай Расулра иштирак шулча. Думу талитариъ иштирак хьуз вари уьлкейиан машгьур спортсменар гъюру. Талитариъ узу 65 километр манзилназ жаргъуз заявка тувуз ккайза, хъа шураз гьеле сабан мукьан ярхла манзилназ жаргъуз ухди ву, гьаддиз дугъан багахь хьуз узузра 16 километр манзил улупунза.
Махлукьатлу спортдин жаргъбар гъахури, ихь республикайиъ 4-пи йис ву. 2500 кас улупнашра, душваъ иштирак хьуз заявкайихъан 10 агъзур ва артухъ манат тувну ккунду. Гьаци вушра, му талитариъ иштирак шлу йишвар вари ацIна. Учуз республикайин спортдин министерствойин кюмекниинди думу талитариъ иштирак хьуз мумкинвал гъабхьунчуз.
18-пи апрели жаргъбариан живанарин арайиъ Дагъустандин чемпионат гъябгъюру. Милана душваъра иштирак шулу. Махлукьатлу жаргъбариан талитар гьар йисан ноябрин вазли Дербентдиъра гъахура. Думу талитариъра Урусатдин хайлин йишвариан хизанариинди агьалйир иштирак шула. Душваъ хизандихъди иштирак хьувал ич хизандинра аьдат дубхьна»,
– гъапнийи Максим Дадашевди.
