Наргиз Гюлечова 

Улихьна йигъари Табасаран райондин НичIрас гъулаъ аьхю мажлис кIули гъубшну. Думу мажлис тазади гъулан имамди дерккнайи Мягьмуд Гьяжиевди тешкил гъапIуб ву.

Къайд дапIну ккундуки, Табасаран райондин Гьарихъ гъулан агьали, Дагъустандин Огни шагьриъ аьхю гъахьи Мягьмуд Гьяжиев НичIрас гъулан имамди цци 2-пи июлихъанмина лихурайир ву. Жигьил имамди НичIрас гъулаъ тешкил гъапIу му серенжемдиъ, республикайин шагьрариъ яшамиш шулайи гъуландарси, жара гъуларин агьалйирра иштирак гъахьнийи. 

Мягьмуд Гьяжиевдин гафариинди, му савабнан мярака инсанарин арайиъ сабвал хьуб метлеб ади кIули гъубхуб ву. 

«Гъулан агьалйирра, удучIвну душнайидарра вари уч духьну, йисандин арайиъ саб ражнукьан гьамциб жюрейин серенжем гъабхуб гъийин йигъан чарасуз ляхин ву. Фицики гъи гъулхьан ярхлаъ ади аргъаж шулайи наслариз чпин абйирин Ватан, гъул-хал наан аш кIваълан гьархуз хъюгъна. Саспидариз гъул фу вушкьан аьгъдар. Гьаддиз багъри гъулаз дицдар касар гъюбан, чпин веледар гъулахъди таниш апIбан бадали, му жюрейин серенжемар кмикмиди тешкил апIури ккунду. 

Мажлисдиз учу, ихь райондин имамарин председатель Ансар Рамазанов кIулиъ ади, диндин рякъюъ аьгъювалар гъадагънайи жара гъулариан вуйи жигьил аьлимаризра дих гъапIнийча. Дуфнайи хялари варидари ужудар насигьятнан гафар гъапнийи. Дурариз варидариз му серенжемдиъ иштирак хьпан кІваантIан чухсагъул кIураза. Гьит Аллагьу Тааьлайи ухьу туву садакьа, апIурайи ужувлан ляхнар ва ихь гьарсарин гъибадат заан дережайиинди кьабул апIри», – гъапнийи гъулан имамди. 

Мягьмуд Гьяжиевди мажлисдихьна гьязур хьпаканра ктибтнийи Гьаци, серенжем тешкил апIайиз кьюд-шубуд йигъ ккимиди дугъу гьамциб кьаст айиваликан гъуландариз мялум гъапIну ва дурар, дишлади вари сатIи духьну, тешкиллувалиинди мажлисдихьна гьязур хьуз хъюгъну. 

«Шли пулин дакьатариинди, шли жвув иштирак духьну, тамам варидари му мярака тешкил апIуз кюмек тувну. Гьар йигъан кюмекнан теклифар диври, жара йишвариан зенгар апIрударра фукьан вушра гъахьнийи. Гъулан дишагьлийиризра ма ша Аллагь, вари сатIи духьну, цIикбарилан гъадабгъну, гьар жюрейин ипIрудар гьязур гъапIнийи. Гьаци учу му мажлис заан дережайиъди кIули гъубхунча», – ктибтну Мягьмуд Гьяжиевди. 

Мажлис ккебгъайиз улихьна, мина дуфнайи хяларин гьюрмат уьбхюри, варидариз ипIруб гьивнийи. Ушв гьибтбан кьяляхъ, гъулан имамди аятар дурхну, мажлисдин мярака ачмиш гъапIну. Мавлиддиъ жигьил аьлимари Мугьяммад пайгъамбарикан (с.аь.в.), дугъан аьсгьябарикан ва дурарин ляхин давам гъапIдарикан ктибтбан кьяляхъ дуфнайи гьюрматлу хялариз ва гъулан агьалйириз гаф тувнийи.

НичIрас гъулан агъсакълар ТIагьирбег Сефербеговди ва Сядуллагь Мягьямадовди, гъулан жямяаьтлугъдин сабвал дюбхну ккуниваликан, гъулаз дуфнайи жигьил имамдиз диндин ляхнариъ кюмек тувну ккуниваликан гъапнийи. Дурари гьацира ничIрасариз гьюрмат улупури дуфнайи хялариз ва уч духьнайидариз варидариз чухсагъул мялум гъапIну. 

Табасаран райондин имам Ансар Рамазановра уч духьнайидарин улихь удучIвну гъулхнийи. 

«Гьюрматлу НичІрас гъулан жямяаьт ва уч духьнайидар! Ихь гьаму мажлис ва гьарури туву садакьа Аллагьди заан дережайиинди кIабул апIри. НичIрасар, магьа ичв гъулаз цIийи имам дуфну гизаф вахт дар, амма му бицIи вахтнан арайиъ жигьил имамди саб кьадар ляхнар духна. Гъит Аллагьу Тааьла дугъкан рази ишри. Ичв терефнаан дугъаз гафнииндира, ляхнарииндира кюмек тувуб тIалаб вуйиз. Ургуд йисан медресейиъ дурхну, чав дуламиш шулайи багъри Огни шагьур гъибтну, думу магьа ичв гъулаз дуфна. Му касдин зегьметназ ухьу чухсагъул дупну ккунду. Гьаму мажлис гьязур апIузра дугъу фукьан вушра зегьмет гъизигну. Ухьура, му ляхниз кьимат тувну, мицдар серенжемар ккадаъну ккундар. Дурарикан ухьуз гизаф хайир а, фицики мицдар мажлисар жвуваз аьгъдруб дубгъуз мумкинвал тувру берекетнан серенжемар ву», – гъапну, мажлис аьхирихъна хури, Ансар Рамазановди.