Мейлан Нежефов

8-пи ва 9-пи январиъ Хиварин гъулан спортдинна тамашйир апIру майдандиин футболин талитар гъахьну. Талитар тешкил гъапIдар ва кIули гъухдар райондин имам Шябан-гьяжи Салигьовдин регьберваликкди райондин РД-йин муфтиятдин мярифатнан отдел ва «Хив райондин жигьилар» ДРОО-йин председатель Мустафа Сеферов ву.

 

«ИкибаштIан, гъирагъдиланра турнириз ккундуш гафниинди, ккундуш ляхниинди, хъа гьацира пулин дакьатарииндира кюмек туву касарин ччвурар ктудухди гъитуз шулдарзухьан. Дурарин дестейиъ РД-йин Халкьдин Собраниейин депутат, СВО-йин иштиракчи Расим Гьяжиагъаев, «Дагъустан Республикайин ватандаш’валин комитет» жямяаьтлугъ гьяракатнан председатель Арсен Шагьсинов, Хив райондин Жямяаьтлугъ палатайин председатель Айдабег Мазов, МВД-йин Хив райондин ОМВД-йин начальник Насир Ягъибегов а. Дурариз мициб ляхниъ кюмекназ бакар хьуз хъана кьувват тувричпиз.
Талитариъ 12 команда иштирак гъахьнийи. Полуфинализ Хив – 1, Гъвандикк, Хив – 3 ва Хирижв гъуларин командир адахьну. Турнир гъабхбан метлеб аргъаж шулайи наслар кьюд йигъ хьнура телефнариан марцци гьавайихьна адагъуз ккунди, дурарин сагъламвалин гъаразнаъ ади, гьацира, ухърубдихьан, зигрубдихьан ярхла апIуз ният ади, спортдихьна жалб апIуб вуйич. Эгер райондин агьалйириз гъубху турнирикан 5 проценткьан мянфяаьт гъабхьнуш узу шад вуза» – гъапнийи Мустафа Сеферовди.

Футболин талитариъ Хив-1 команда гъалиб гъабхьну. Кьюбпи йишв Хирижв гъулан живанари, хъа шубубпи йишв гъвандккарин футболистари гъазанмиш гъапIну.