Зубайдат Шябанова

Табасаран райондин Хючна гъулаъ Гизаф игьтияжар гьуркIру жигьиларин центрин дарамат рас апIура. Центриъ бинайиан расвалин ляхнар Урусатдин «Жигьилариз вуйи регион» федералин программайин дахилнаъди гъахура.

Центрин дарамат 1978-пи йисан тикмиш гъапIуб ву. Думу дарамат совет вахтари ва дидин кьяляхъ йисари райондин жюрбежюр карханйирин ва тешкилатарин ляхнин гюзчивал гъабхру идараси гьяракатнаъ айиб вуйи. Тикмиш гъапIу йисхъанмина думу хулар жюрбежюр йисари гьадушваъ айи идарйирин вакилари чпин кьувватариинди рас апIури гъахьну. Гъи дарамат лап читин гьялназ дуфна.

Тикилишчйирин ва расвалин ляхнар гъахрударин улихь гъи хайлин месэлйир дийигъна. Проектдиз тялукь вуди, дурари кьюб мертебайин дараматдин 1480 квадратный метр къайдайиз дубхну ккунду, гьадму гьисабнаан административ ва жюрбежюр себебариз ишлетмиш апIру 38 халра. Гьацира коммуникацйир, гъваъ, унчIвар, раккнар ва улхьан цалар цIийи алауру. Расвалин ляхнар июндин аьхирариъ ккергъну имишра, саки вари гъваъ алдабгъну цIийиб иливну, кьюбпи мертебайин полар гьюдюхну, цалар дюз дапIну ккудукIну. Дараматдин расвалин ляхнариин 9 кас лихура. Вари ляхнар 1-пи сентябриз ккудукIуз планарик ка.