Гюльнара Мягьямедова

26-пи августди йишвну сяаьт 12-диз 27 дакьикьа ккимиди Дагъустандиъ жилар гъутIурччвну. Жилар тIурччвувалин гьацIкьял Мягьячгъалайихьан 88 километр манзилнаъ Каспий гьюлин акваторияйиъ айи. Дербент шагьрихьан 4I километр манзилнаъ кафари терефнаъ жилар тIурччвбан кьувват 6,0 магнитуда улупну. 12 километр жилиъ жилар тIурччвували Мягьячгъала, Каспийск, Дербент, Буйнакск, Избербаш, Хасавюрт шагьрарин, Табасаран, Кумторгъала, Мягьярамкент, Леваши, Хив районарин агьалйириз гучI тувну. Йишвну нивкIуз душнайи хайлин агьалйир, уягъ духьну, кючйириз удучIвну.

 

Урусатдин МЧС-дин Дагъустан Республикайиъ айи идарайин мялуматарин гъуллугъну туврайи хабрариинди, гъадаргъу хулар, гъийиху, зарар гъабхьи инсанар адар.
МЧС-дин гъуллугъари, жилар тIурчIвруган гьапIну ккундуш, кIваин апIура.

1. Жилар тIурччвуз хъюгъюбси, документар ва пул гъадабгъну, учву айи хулариан удучIвай!
2. Лифтнаъ муучIванай. Умбрариъди чIатинди утIурччвай.
3. Кючейиз удучIвбан кьяляхъ хуларихьан, мурхьларихьан, электричество айи симарихьан ярхла йихьай.
4. Эгер хулариан удучIвуз хъуркьрадаш, унчIвариз багахь махьанай, варитIан ацIу цал гъябгъюрайи йишвахь раккнарин арайиъ дийигъай. Ижми устул аш, устлин кIанакк ккучIвай.
5. Килбит, шам, яна ачухъ цIа ишлетмиш мапIанай – белки наанкIа газ удубчIвурашул.
6. Абхърайи айвандихьан, карнизарихьан, гьудутIнайи симарихьан ихтиятди гъузай.
Гьаму къайдйир гьарсар касди кIваинди гъитну ккунду. Жилар тIурччвуз хъюгърайиваликан вахт ккимиди мялумат тувуз шулдар. Думу табиаьтдин гъагъи завал ву.