Зубайдат Шябанова
Июлин 18-пи йигъан РД-йин Правительствойиъ гъабхьи заседаниейиъ республикайин премьер-министр Аьбдулмуслим Аьбдул-муслимовди къайд гъапIганси, къанундиинди дарди, яна ашкар дарапIди, налог тутрувуз жиниди лихурайидарихьан Дагъустандин бюджетдиз НДФЛ-иан 5 миллиард манат пул гъюрадар.
Дагъустанди ляхнихъди агьалйир тямин апIру касар сирнин экономикайиккан ккадагъру цIийи къайдйир ишлетмиш апIура, алвер апIру карханйириъ лихурайи вакиларин зегьметнан гьякъи ва гъазанж къанундин ихтиярарин гьялназ хуз рякъяр агура.
Гьамдихъди аьлакьалу вуди Аьбдулмуслим Аьбдулмуслимовди му ляхниъ асас йишв профилактикайи дибисну ва агьалйирихъди ихтиярарин культурайин гьякьнаан мялуматаринна гъавриъ тIаъбан ляхин дубхну ккуниваликан гъапну.
«Эгер ухьу Урусатдиъ налог тутрувди лихурайи зегьметнан рынокдин кьялан гьисабарин сиягьдик кахъиш, му варитIан асккан гьисабариинди (МРОТ-дин улупбаринди), физический касарин терефнаан Дагъустандин консолидированный бюджетдиз 5 миллиард манат гъюрдар.
Хусуси дилаварвал регистрация апIбаъ вая инсан ляхниз кьабул апIруган ихтиярар чIур апIурайидариина илзигну кIури, ляхин улихь гъябгъюдар. Сабансана къанунсузди ляхнариз агьалйир кьабул апIурайидарин ляхин дикъатлуди ахтармиш ва дурарихьна уьлчмйир кьабул дапIну ккунду», – гъапну РД-йин премьер-министри .
