Наргиз Гюлечова

Жвул’арин мист ва дидихъ хъайи минара – табасаран архитектурайин уьмарат – дабгъура, дидин цаларикан шибар ктахьура, цалариъ шид убчIвра, думу уьбхбан бадали кьатI’и уьлчмйир кьабул апIуб лазим ву, кIури, аьхиримжи йисари ихь ватанагьлийир редакцияйиз саб-швнуб ражари илтIикIнийи.

Дагъустан Республикайин культурайин ирс уьбхбан Агентствойин гьаму йисандин ляхнин натижйириз бахш дапIнайи конференцияйиъ узу гьаму месэлайин гьякьнаан Агентствойин кIулиъ айирин вазифйир вахтназди тамам апIурайи Загидат Исаевайихьна илтIикIунза.

Йиз суалназ жаваб туври, дугъу республикайиъ мициб гьялнаъ айи объектар хайлин а, гъапнийи. Асас вуди, дицдар объектарихъди аьлакьалу месэлйир гьял апIбан варитIан аьхю читинвал гьаддиъ аки, дурарин кIул’ин фужкIа алдар. Гьаддиз, думу объектар рас апIбан бадали дакьатарра деетуз шуладар, къайд гъапIнийи идарайин кIулиъ айири.
«Диндихъди аьлакьалу вуйи культурайин объектар диндин тешкилатарин хилиз тувна. Хъа Жвул’арин мист ва дидихъ хъапIнайи минара федералин мяна айидар ву. Гъи думу объектар рас апIбан бадали, швнуб-саб жюрейиинди дакьатар деетуз шулу: меценатарихьан, рягьимлувалин фондариан ва гьацира гьюкуматдин терефнаан.

Му мист федералин мяна йиб вуйивализ лигну, учу, ич терефнаан проектдинна сметайин документация гьязур дапIну, «Культура» милли проектдиз аьрза тувуз рази вуча. Мистна минара рас апIуз федеральный центриан дакьатар деетбак умуд кайиз», – гъапну Загидат Исаевайи.

Дугъу, му месэла чпин гюзчиваликкна гъадабгъну, минарайин гьял ахтармиш апIузра гаф тувну.
Мидланра гъайри, Загидат Исаевайи муниципалитетариз му жюрейин объектариин расвалин ляхнар гъахбан бадали жюрбежюр грантарин проектариъ иштирак хьуз мумкинвал айибдиканра мялум гъапIну.