Мейлан Нежефов

Хив райондин Хиварин гъулан администрацияйи, гъулан жямяаьтдиз улупнайи саб гектартIан артухъ йишван гъайгъу зигури, 21-пи январи дилин цал илтIибкIбан ва гъелемар итбан ляхин башламиш гъапIну.

 

«Гъулан регьбервал гъабхуз гьаму кьанди хъюгъюнза. Му йишв гъулан жямяаьтдиз йиз улихьна вуйи главйири улупнайиб вуйи. Гьаци вушра мушв’ин хил иливуз ва тек сар чан хайирназ ишлетмиш апIуз ккунди айидарин кьадарра цIиб дайи.
Гьаддиз, гьавйири манигъвал туврайивализра дилигди, му ляхин ккебгъуз ният гъапIунча.

Гьамусяаьт итнайи гъелемар хифрандар вуйич. Хъа хьадукра, Аллагьдин амриан, ихь жилиин шлу вари яр-йимишдин гъелемар кивдича. Гъит жямяаьтдиз улупнайи йишв жямяаьтдин хилиъ гъубзри ва файда кади ишлетмиш апIри. Узу умудлу вуза: гъийин гъелемарикан закур бегьер хру гьарар духьну, ихь веледари дурарин тIяаьм дадмиш апIиди.

Улихьна йигъари духнайи гъванарин цалра, ругар ахьну, йишварра дюз гьапIунча. Мидланра савайи, 80 метр штун шлангарра ккерчнийча. Гьелбетда, ляхнар гьяракатниинди давам хьиди. Администрацияйин терефнаан гъулан имам Мансур-Гьяжи Везировдиз ва гъабхурайи ляхниъ бакар гъахьи гъулан агьалйириз аферин кIураза», – гъапнийи ич сюгьбатнаъ Хив гъулан глава Мансур Жалавхановди.