Гюльнара Мягьямедова
15-пи ноябри Дагъустан Республикайин Жямяаьтлугъ палатайиъ РД-йин Жямяаьтлугъ палатайин советдин 2025-пи йисандин натижйир йивру 27-пи заседание кIули гъубшнийи. Серенжемдиъ региондиъ ватандаш жямяаьтлугъдин институтар артмиш апIбак палатайин членари, экспертари ва дидихъди аьлакьа уьбхюрайидари киву пайназ кьимат тувнийи ва тешкилатди гъубху уьмуми ляхнин натижйир гъивнийи.
Аьдат дубхьнайиси, сифтейин гаф хьади Жямяаьтлугъ палатайин председатель Аьзизбег Черкесов удучIвну гъулхнийи. Дугъу советдин членари ярхи йисди сатIиди, албагну гъубху уртахъ ляхнин мяналуваликан ктибтнийи.
Къайд апIуб лазим вуки, 2025-пи йисан РД-йин Жямяаьтлугъ палатайи федеральный ва регионарин арайиъ гъахру ляхнариъ иштираквал гужли гъапIну, Урусатдин Федерацияйин цIийи регионарихъди сатIиди вуйи ватанпервервалин ва рягьимлувалин проектариъ иштирак гъахьну, гьацира республикайин районариъ жямяаьтлугъ гюзчивал гъабхувал тямин гъапIну.
Жямяаьтлугъ палатайин заседаниейин аьхириъ илимдин ва культурайин цирклариъ мяналу шил гъибту машгьур дагъустанлуйириз РД-йин Жямяаьтлугъ палатайин гьюрматнан грамотйир тувнийи. Дурарин арайиъ ихь ватанагьлийирра айи. Лишанлу гъапIдарин цIарнаъ айи экономикайин илмарин доктор, Урусатдин лайикьлу экономист Зейдула Юзбегов – Дагъустан Республикайин экономикайин илим ва гьюкуматдин идара апIбан гъурулуш артмиш апIбаз, илимдин жямяаьтлугъдин, гьюкмин органарин ва жямяаьтлугъ гъурулушдин арайиъ аьлакьйир уьрхбак лайикьлу пай кивбаз лигну; филологияйин илмарин доктор, профессор Велибег Загьиров – ватандин филологияйин илим артмиш апIбаз, мярифатнан ва илимдинна педагогвалин ляхин гъабхбаз, Дагъустандин халкьарин культурайин ва чIалнан ирс уьбхбаз лигну ва Дагъустандин халкьдин шаир Сувайнат Исрафилова –Дагъустан Республикайин литературайин ва культурайин артмиш’валик лайикьлу пай кивбаз, редакторвалин ляхин апIури ва чан яратмишариинди бабан чIалар уьрхбак пай кивбаз лигну.
Ихь ватанагьлийириз туву гьюрматнан грамотйирикан улхури, РД-йин Жямяаьтлугъ палатайин экономикайин политикайин, АПК-йин артмиш’валин, бицIи ва кьялан предпринимателвализ кюмек тувбан, туризмйин ва экологияйин комиссияйин член, ДГУ-йин политикайин экономикайин кафедрайин заведующий Низами Аскеровди гьамци гъапнийи: «Гьаму касари 2025-пи йисан чпин юбилеяр къайд гъапIну. Гьаддихъди аьлакьалу вуди, Жямяаьтлугъ палатайиз ихь халкьдин, республикайин, уьлкейин культурайик, илимдик лайикьлу пай киву, ухьуз ккуни, гьюрматлу, вари Табасарандиз, Дагъустандиз машгьур вуйи инсанар лишанлу апIбан теклиф адабгънийза. Жямяаьтлугъ палатайин аьхюну пай членари йиз теклифназ чпин разивал улупнийи. Ва Жямяаьтлугъ палатайин заседанйириъ республикайин халкьдин вакилар лишанлу апIбан теклиф аьдатнаъ ипбанди гъахьнийи».
Гьюрматлу Зейдула Гъадималиевич, Велибег Мирзабегович, Сувайнат Мевлюдиновна, Жямяаьт-лугъ палатайин терефнаан учву лишанлу апIуб газатдин редакцияйи тебрик апIури, учвуз халкьдин илим, культура, яшайишдин хъана заан хъуркьувалар ккун апIурача.
