Гьамусяаьтна кьюрдун вазарин вахтна галариз хъаънайи чарвйирин сюрйир гьяракатниинди сивариз хъаъбан ляхин тешкил дапIна. Мялум вуйиганси, Дагъустан Республикайиъ кьюрдун вахтна вари районариан хъапIну гъюрайи мал-къара уьбхру галар ерлешмиш духьнайи хайлин зонйир а.
Гьарсаб зонайин галариъ кьюрдун вазари дагълу районарин мал-къара уьбхюра. Хъа хьад улубкьубси, саки вари галариъ айи мал-къара сивариз хъапIра. Магьан гьамусяаьт-нара чарвйирин сюрйир сивариз хъаъну гъягъбан ляхин аьхирихъна гъюра.
Улихьна йигъари Дагъустан Республикайин гъулан мяишатдин ва ипIру-убхъру сурсатарин министрин заместитель Мягьямед Шапиев ва мал-къара галариан сивариз хъапIбан месэлйириз лигру Управлениейин кIулиъ айи Неби Аьбдулгьямидов Кочубейин зонайин чарв-йир хъаърайи сивариз лигуз гъушну.
РД-йин гъулан мяишатдин ва ипIру-убхъру сурсатарин Министерствойин пресс-гъуллугънаан туврайи мялуматариинди, министерствойин гъуллугъчйирна мал-къара галариан сивариз хъапIбан месэлйириз лигру Управлениейин пишекрар, чарвйир хъаърайи сиварин гьял фициб вуш, чарвйирин сюрйир фици хъаъну гъягъюраш ахтармиш апIбан бадали, кми-кмиди ва сатIиди душвариз гъягъюра.
Мягьямед Шапиевди мялум гъапIганси, багарихьди Кочубейин зонайиъ айи чарвйирси, имбуну зонйириъ айи вари чарвйирра сивариз хъаъну гъягъиди, гьадму гьисабнаан Хив райондин чарвйирин сюрйир айи Дербент зонайин галарианра.
