Гьаму йисан COVID-19 тарабгъбан хатIа айивализ дилигну, ЕГЭ вузарик урхуз кучIвру выпускникаритIан туврадар. Гьаддихъди аьлакьалу вуди, РД-йин образованиейин ва илимдин министерствойи ЕГЭ туврудар цIийи кIул’ан гьисабназ гъадагъбан ляхин гъубхну. 2020-пи йисан Дагъустан Республикайиъ гьаму йисандин 8786 выпускникди, улихьна йисарин 1919 выпускникди, СПО-йин 62 выпускникди ва улихь вахтнаъ ГИА тувуз дархьи 51 касди ЕГЭ тувди.
ЕГЭ 3-пи июлилан 25-пи июлизкьан давам хьиди. Аьзарлу духьну вахтниинди имтигьян тувуз дархьидариз аьлава вахт 3-8-пи август улупна. ЕГЭ тешкил апIбан бадали 67 пункт гьязур дапIна. ЕГЭ тешкил апIбиина ва гъабхбиина 4500 пишекрар жалб дапIна.
Роспотребнадзорин теклифниинди имтигьян тувру классариъ ЕГЭ-йин иштиракчйир арайиъ лазим вуйи манзил ади дитди. ЕГЭ тувру пунктар Роспотребнадзорин тIалабариз асас вуди техникайин дакьатарихъди, дезинфекция апIру дармнарихъди, маскйирихъди ва элжгарихъди тямин дапIну ккудубкIура: инсандин кIулихъ саб литр убхъру марцци шид, 4 маска, садар элжгар, 10 миллилитртIан цIиб дарди антисептик, ЕГЭ тувру гьар пунктнаъ инсандин бедендин температура ебцру 2 термометр, рециркуляторар (гьава марцц апIру авадлугъар) ади ккунду.
ЕГЭ-йиз гьязурлугвалар РД-йин айтIан ляхнарин министерствойихъди, сагъламвалин министерствойихъди, Роспотребнадзорин Дагъустандиъ айи идарайихъди, «Ростелеком» ПАО-йин Дагъустандин филиалихъди, транспортдин ва рякъярин мяишатдин министерствойихъди сатIиди гъахура. Гьаму мялуматар 22-пи июндиъ РД-йин премьер-министр Артем Здуновди видеоконференцияйин къайдайиъди кIули гъубху, коронавирусдин инфекция тарабгънайи вахтнаъ 2020-пи йисан ЕГЭ тешкил апIбан месэлйириз бахш дапIнайи совещаниейиъ РД-йин Правительствойин вице-премьер – образованиейин ва илимдин министр Уммупазил Уьмаровайи тувнийи.
Уммупазиль Уьмаровайи 2020-пи йисан ЕГЭ гъабхбан ляхниъ иштирак шулайи образованиейин тешкилатарин мялимариз 60% компенсация тувруваликанра хабар дебккнийи.
