Велед апIуб гьунар дар,
Думу уьрхюб гьунар ву.
(Халкьдин мисал)
Гьаму улихьна йигъари Инстаграмдиъ инсанарин хусуси страницйириз лигурайи вахтна чан уьмрикан дибикIнайи,тялукь шикил хъайи макьалайи йиз фикир чаина жалб гъапIнийи. Думу макьалайин эйсийиз узухъди дуствал ккебгъуз теклиф гъапIза. Учу Инстаграмдиан дустар хьпан кьяляхъ дугъкан жикъиди ва кьатIиди чан уьмрикан узуз ктибтуб ккун гъапIнийза. Гьелбетда, дугъан аьжайиб ва жарадариндиз ухшар дару уьмрикан дибрикIди гъузуз гъабхьундарзухьан. Дугъу узкан учв Маринаси улупуб ккун гъапIнийи.
Маринайин ктибтбаан.
«Йиз 18 йис гъабхьиган, йиз адаш узуз гъахи ва багъри адаш даруб якьинди аьгъю гъабхьунзуз. Узу дадайин фуник кимиди, йиз гъахи адашди дада гьадаънийи. Дада дархи адашдихъди таниш ва сатIи шлуган, йиз кьюд йис вуйи. Гьамус йиз 18 йис бегьем гъабхьиган, дурари му ляхникан узуз сар шликан-вуш ебхьайиз, узуз фукьан кьутIкьли ва учIвру шулушра, чпи ктибтуз мясляаьт адабгънийи. Узу аьламат духьну, уюгъси гъах ва апIру гаф-чIалнахъ мюгьтаж гъахьунзу. Ихтилат ктибтбалан кьяляхъ дурари узуз гъапнийи: эгер гъахи адаш агуз ният аш, учу дидиз къаршу дарча ва увуз ич терефнаан ихтиярра тувурча, лазим гъабхьиш, кюмек апIузра гьязур вуча.
Йигъ хябяхъдиз илтIибкIнийи. Йиз кIул ва юкIв узухъ хъпехъурадайи, фикрар ва хиялар кьалу дифарси гъидикьнайи… ГьацIишварра гъахьну, аммаузуз нивкI адар, йиз кIул гъагъи фикрари аьсси дапIна… Гъахи адаш! Фицир вуйкIан думу? Яраб, дугъан узкан вуйи фикрар фицдар вуйкIан? Яраб, думу му чав гъапIу ляхниин швумал вуйкIан? Эгер чахъ лицури узу гамар алдагъиш, думу шад шуйкIан? Му суалари, фикрар-хиялари узузра аьгъдарди сабцIиб вахтназ нивкIуз гьаъзу. Хъана уягъ гъахьунзу… Гьаму йиз бахтлуди гъушу 18 йис хизандин арайиъ кучIлииинди гъушдар вуйкIан? Гьаз узуз мициб гъабхьну, узу фу чIуруб гъапIну? Гьаму жюрейин фикрари сикин дарди сабди саб эвез апIурайи…
Узу узуз сабур тувза ва аьгьвалатназ жара терефнахъанди лигуз чалишмиш гъахьиза. Узу бицIидарин багъдиз гъягъюрайи вахтна гьацIишвариз узухъди гъузри, шиклар зигури, пластилиндикан жаквлар апIури, хъасин мектеб ккебгъну ккудубкIайизкьан йиз кьяляхъ далуси гъахьи, йиз тIуб гьадабтIиш, чан кIваан сес туври гъахьи касдиз, гьам паркариъ, гьам багъариъ, яни наънан гъюрушра зу кIваинди, хиликк сумка ккади гъафи касди гъи узуз вари вуйибси ктибтнушра, я дугъу гъапубдихъ хъугъуз ккунди адарзуз, я дугъаз гъи дархи адаш пуз кIулиъ убшрира адариз. Му фикрар-ниятарихъди гвачIин гъабхьну …
Маш-хил дижибкIну, суфрайихъна чай убхъуз уч гъахьича. «Адаш! – дупну, багъри касдиин алархьза. – Фукьандари йиз уьмриз лигури, уву узуз дархир ву гъапишра, увуз барабар, уву эвез апIру кас сарун йиз уьмриъ даршул, адаш, жан узуз багьалу кас!»
Му гьядисайи, гьюрматлу газат урхурайидар, сабсан ражну халкьдин мисалиъ дупнайи гафар – велед апIуб гьунар дар, думу уьрхюб гьунар ву – гьякьлудар вуйиб тасдикь апIура.
Гъи Марина, ужудар аьгъювалариинди вуз ккудубкIну, ляхин-карнан ва хизан-кюлфетдин эйси духьна. Бахтлу ва нурлу уьмрин эйси ишри чав. Дадайинна адашдин манишнан ялавнахъ гьич саб вахтнара сар веледра мюгьтаж даришри!
