Ихь уьлкейиъ коронавирусдин уьзрихъди аьлакьалу вуди дилаварчйир ва дурарин карханйириъ лихурайи касар ляхнихьан духьну саки 3 вазкьан ву.
Му читин аьгьвалатнаан чпи фици кIул адабгъураш, узуз улихьна йигъари Мягьячгъала шагьриъ ерлешмиш дубхьнайи дишагьлийириз хъайивал апIру салондин эйси Калимат Мягьямедовайи (чан тIалабниинди дугъан ччвур дигиш дапIнача) ктибтнийи. Калимат Мягьямедовайин гафариинди, шубуб вазлин арайиъ дугъазси, дугъан салондиъ лихурайидаризра лап читинди алабхъну.
«Йиз салондиъ сменайиинди 20 касди ляхин апIура. Гьадрарихъди узура лихураза. Мягьячгъала шагьриъ чпиз лигуз, хъайивал апIуз гьаммишан, швнуд-сад йисариинди учухьна гъюрайи гизаф муштари дишагьлийир айич. Жара шагьрарианра хайлиндар ич салондиз гъюра. Ккудушу, ляхин дарапIу вазарин арайиъ йиз салондиъ кушарихъди ва шибарихъди ляхин апIру пишекрариз цIибди вушра ляхин гъабхьну, фицики дурари чпин хулариъ инсанар кьабул апIури, ясана чпин муштарйирихьна гъягъюри ляхин гъапIну. Зат ляхин дарди гъуздар – машарикан рангар кдатру пишекрар (визажистар-косметологар) ву.
Магьа 15-пи июндилан башламиш дапIну салонариз лихуз ихтияр тувна, амма, Роспотребнадзори улупнайи тIалабар дюрхну ккунду. Гьадму йигълан мина вазлин аьхиризкьан кушарихъди ва шибарихъди ляхин апIурайи пишекрарин вари йигъариз клиентар нубатнаъ дидикIну а. Сарун лихуз ихтияр тувнашра, хъанара, гьелелиг ляхин адрудар машарикан рангар ктатру пишекрар ву. Асас себеб – гьамусяаьт я сумчрар адрувал, ясана уччвуди гьязур духьну гъягъру рягьятвал гъадабгъру йишвар ачмиш дапIну адрувал ву. Му пишейин вакиларин гъюрайи гъазанж – сумчрарин вахтна швушвар, дурарин дуст шубар кабалгбалан ву. ИкибаштIан, дурариз гьамусяаьт гизаф гъагъиди алабхъна. Хайлиндарин хулаъ бицIидар а. Дурариз ипIруб, алабхьруб ккунду. Хъа ляхин адрувализ лигну, гъазанмиш апIузра шуладар», – кIура Калимат Мягьямедовайи.
Йиз сюгьбатчийин гафар узура тасдикь апIураза. Гъазанмиш апIурайи йишв адруган, яшамиш хьузра гъагъиди алабхъуру. Ихь рес-публика гьаммишан сумч-рар, шадлугънан серенжемар булди шлу йишв ву. Дишагьлийири чпиз хъайивал апIру салонарин ляхинра ва душваъ лихурайи пишекрарин гъазанжра гьацдар серенжемарикан асиллу ву.
Багарихьди му чIуру уьзур терг дубхьну, республикайиъ вари циркларин ляхин къайдайиз гъюр кIури, умуд кивдихьа.
