Гьюрматлу газат урхурайидар, исихъ тувнайидарсдар зарафатнан ихтилатар узу гизаф ктагъури ва кми-кмиди дикIури шулза. Дурарин аьхюнубсиб пай, йиз уьмриъ шулайи гьядисйириин, гъирагъдилан, жвувандарин арайиан гъеерхьу гафар-чIалариин биналамиш духьну, ярхи апIури, дюз алаури, тартиб гъапIдар вуйиз.
Гьюдюхювал
Сад йигъан Мажвгларин Аьлди Заан Ярккарин Велдихъди кIари хъайи хюндихъ кьяб хъайи мотоцикл гьюдюхбан йикьрар гъийитIнийи. Хъайигъан Аьли, чан худул Навруздихьди мотоцикл хъапIуз гъитну, тазади шулайи ханухрайихьна гъягъюру. Велдиз хялижв духьну, хуш-беш, гаф-чIал дапIну, чай убхъбалан кьяляхъ, ихь йитIнайи йикьрар ва адабгънайи къарар кьувватнаъ имийин, Вели, кIури, гьерхру Аьлди. КIулра ибхну, Велди жаваб гъапIнийи:
– Валлагь, Аьли, дарпиб-дархьиб амдариз, амма хюни кIарира хъади тувуз хпир рази шуладариз… Я хюни, кIура, я кIари.
– Пагь! – тадабхъуру Аьлдихьан. Саб артухъ фикир дарапIди дугъу гъапи:
– Жаргъ, зарб апIин, Навруз, увура ихь мотоциклихъан кьяб хъудубч. Чаз ккунш мотоцикл, ккунш кьяб кадабгъри.
Тюфенгиан ваъ, пулемётдиан йивуйза
Гьар гъубхъиган, Нюспягь халуйи чан хпир Айханум халайин тухум-тара киври-ктагъури шулу. Нубатнан ражари, дубхънайири хулаъ гъалмагъал ипну, чан тухум-тара киври-ктагъури айиган, Айханум халайи кIуру:
– Я гъужа, я байкIа, саб ражари гъадабгъну тюфенг, вари йиз багахьлуйир ккуршвну гьудучIв…
– Гьей, хпир, узуз тюфенг ккунди айинхъа, даршсан пулемёт… Саб ражари йивну, гъул-халкьан илимдарди ккидипну, дармадагъин дапIну гьудучIвруси.
Якъ фтин тахсирлу ву?
Амирялдихьан чан хпир Гьюри-перийи, гвачIнин ухди гъудужвубси, гъи фу йигъ ву кIури, гьерхнийи.
– Фу йигъ шулу, 3-пи июль ву сарун, – кIуру Амирялди.
– Ваъ, ваъ, йиз ужур. 25 йис улихьна, гьаму йигъан фу гъабхьну? – хъана текрар гъапIу хпири.
– Увуз фукIа-мукIа дубхьнавуз? Йиз сан хябяхъган узу фу гъипIнуш, кIваин илимдариз, йиз келле увуз компьютер вуйинхъа, 25 йис улихьна гъабхьиб саб дупну кIваина хуз?
– Яваш, я жан жилир, сесер-гьарйир апIури, хилар магьачIарккан. Му йигъ 25 йис улихьна ухьу эвленмиш гъахьи йигъ ву. Саб якъ гъадабгъну, думу дубккну, ихь хал-хизандихъди кьюб мани хинкI дапIну, каббар апIидихьа, – гъапи Гьюриперийи.
– Яваш ари, яваш ари… узу гъавриъ гъахьундарза. 25 йис мидиз улихьна му йигъан ухьу эвленмиш гъахьну кIури, якъ фтин тахсирлу ву? Якъ мушвягъ затра тахсирлу дар, аьхир. Думу якъраз тувру жаза яв халайиз тувнийиш, ужу шуйи, фицики ухьу сар-сарихъди таниш гъапIур гьадму вуйи, – кIуруАмирялди.
Я унчIв алдру, я раккин алдру йишв
Гъунши гъулаз саламдиз гъушу Нюспягьна Рамазан саламдилан (дю-аьйилан) хялижвди Асландиз тувнийи. Рякъюъ гаф-чIал апIбиин машгъул гъахьидарин, чпи Асландин хулаз фици адахьнушра, мурарин кIваин илимдайи. Фицики, мугъан хул`ин я унчIв, я раккин алдайи.
Асландин кейванийи дюн`яйиин алибкьан нази-ниъматарихъди хялар тухъ гъапIнийи. Му йишв Асландихь адапIну, дустар хъайигъан саламдиина гъюру, амма, фици чпи хул’ан удучIвнуш, дурариз мялум гъабхьундайи.
Кечмиш гъахьирихъ ишлар апIурайи дишагьлийири, ишларик кибтIри, я унчIв алдру, я раккин алдру хулаз гъярайи бейнава, кIурайи…
Рамазну Нюспягьрихьинди лигури, гъапи:
– Харжи йишв дарда, бай… Накь ва сан ухьу айи йишв ву, сарун.
