Июлин 8-пи йигъан «Хивский район» МО-йин глава Ярмет Ярметовдин регьберваликкди райондин администрацияйиъ коронавирусдин инфекция таза кIул’ан тарарабгъбаз бахш дапIнайи совещание кIули гъубшну.
Заседание ачмиш апIури, райондин главайи къайд гъапIганси, тIягъвнин вахтна райондин аьтрафариин коронавирусдиан 75 кас аьзарлу духьнади гьисабназ гъадагъну. Дурарикан 66 кас сагъ гъахьну. Коронавирус кайидарихъди сатIиди яшамиш шули гъахьи 296 касдикан 31 кас гьелелиг гюзчиваликк гъузра.
Хив райондин больницайин кIулин духтрин вазифйир тамам апIурайи Агъамягьямед Нурмягьямедовди гьамусяаьт коронавирусдихъди райондиъ айи аьгьвалатнакан ва думу тарарабгъбан гьякьнаан кьабул апIурайи уьлчмйирикан ктибтну. Дугъу мялум гъапIганси, улихьна вазари пневмония ва коронавирусдин инфекция кайи аьзарлуйир сагъ апIувал метлеб вуди ра-йондин больницайин бицIидар бабкан хру отделение госпитализ илтIибкIнийи. Думу 25-пи июндихъан мина хъябкьну.
Дагъустан Республикайиъ айи Роспотребнадзорин Управлениейин Дербент шагьриъ ерлешмиш дубхьнайи ТО-йин начальникдин заместитель Жарият Мягьямедовайи гъапиганси, карантиндиан удучIвру гьарсаб этапдиъ Роспотребнадзори улупнайи кьатI’и тIалабар чарасуз вуди дюрхну ккунду. Гьадму гьисабнаан гъагъи уьзур кубчIвуз хатIа айи инсанар (65 йис ва артухъ яшар дубхьнайидар, сагъ апIуз даршлу ва гъагъи уьзрар кайи инсанар, сабпи нубатнаъди кIван ва нефес хътабгъру гьендемар иццурайидар, диабет уьзур кайидар) чарасузвал адарди хулариан удучIвну ккундар, жямяаьтлугъ йишварихь ва транспортдиъ машниин алахьру маскйир ишлетмиш дапIну ккунду. Мидланра гъайри, маскйир алахьбан ва дизинфекция гъабхувалин къайда жюрбежюр карханйириъ, идарйириъ ва жямяаьтлугъ тешкилатариъ лихурайидари дюбхну ккунивалин чарасузвал гъубзра.
Заседаниейин аьхириъ карантиндин 2-пи этапдиина улдучIвбан тялукь йикьрар кьабул гъапIнийи.
* * *
РД-йиъ айи Роспотребнадзорин Управлениейиан туву мялуматариинди, июлин 9-пи йигъаз Дагъустандиъ:
– 8327 касдик коронавирус уьзур кайивал тасдикь гъапIну;
– 6468 кас му уьзриан сагъ гъахьну;
– 404 кас коронавирусдин уьзриан кечмиш гъахьну.
