3-пи июлиъ РД-йин Жямяаьтлугъ палатайиз 7-пи дих апIбан членар ктагъбан заседание кIули гъубшну.

 

Мялум вуйиганси, Жямяаьтлугъ палатайин вакилар «Дагъустан Республикайин Жямяаьтлугъ палатайин гьякьнаан» РД-йин Къанундиинди, 45 касдикан ибарат вуди ктагъурайидар ву. Гьадму кьадарнакан 15 кас вари Урусатдин ва регионарин арайиъ вуйи, Дагъустандин аьтрафариин гьисабназ гъадагънайи жюрбежюр жямяаьтлугъ тешкилатарин теклифниинди республикайин Главайи, хъа 15 кас Дагъустандин аьтрафариин гьисабназ гъадагънайи коммерцияйин дару тешкилатарин, гьадму гьисабнаан региондин сатIи вуйи жямяаьтлугъ тешкилатарин теклифниинди РД-йин Халкьдин Собраниейи тасдикь апIурайидар ву, имбуну 15-сана кас РД-йин аьтрафариин гьисабназ гъадагънайи ерли жямяаьтлугъ тешкилатари Жямяаьтлугъ палатайин вакиларди ктагъуру.
РД-йин Жямяаьтлугъ палатайин 7-пи дих апIбан дахилнаъ 2 ихь ватанагьлийирра а.

Дурарикан сар Табасаран райондин Ханак гъулан агьали Уьсман Шябанович Мурадов ву. Думу Жямяаьтлугъ палатайин АПК-йинна гъуларин аьтрафар артмиш апIбан, экологияйин ва табиаьт уьбхювалин комиссияйин член ву. Думу 6-пи дих апIбан Жямяаьтлугъ Палатайин дахилнаъдира 2018-2020-пи йисари гъилихну.

Хъа кьюрпи ихь ватанагьли – Табасаран райондин Бургьанкент гъулан агьали Буниямин Демюрбегович Мягьямедов ву.

Буниямин Мягьямедовди «Табаса-рандин нурар» газатдиз туву мялуматариинди, дугъу чан пишекарвалин рякъ РД-йин айтIан ляхнариз лигру Министервойиъ ккебгъну. ЦIиб вахтналан силисчидира гъилихну. Хъасин адвокатвалин ляхнар апIуз хъюгъну ва гьамусяаьт Дагъустандин адвокатарин палатайиъ ляхин апIура.

Уьсман Шябанович ва Буниямин Демюрбегович РД-йин Жямяаьтлугъ палатайин членар хьпахъди тебрик апIури, «Табасарандин нурар» газатдин редакцияйи дурариз ватандаш жямяаьт артмиш апIбаъ ва агьалйирин месэлйир гьял апIбаъ хъуркьувалар ккун апIура.