«Йиз Дагъустан – Йиз рякъяр» республикайин проектдин дахилнаъди расвалин ляхнар тамам дапIну ккудукIбан кьяляхъ, улихьна йигъари Табасаран райондин ТIивак гъулан «Центральная» кючейиъ 3 километрин рякъ официально вуди ачмиш гъапIну.

 

 

Къайд апIуб лазим вуки, гьаму гъябгъюрайи йисан февралин вазлиъ КIежух – ТIивак – Хючна рякъюн гьякьнаан, янаки мушв’ин асфальт улубзувал ккун апIури, ТIивак гъулан агьалйир Табасаран райондин глава Мягьямед Къурбановдихьна илтIикIну. Чан нубатнаъ М.Къурбанов ТIивак гъулан агьалйирин жягьтлувалиин рази гъахьну ва гьадму рякъюн шубуб пайнакан саб пай гъулан агьалйирин дакьатарихъ рас апIувалин гьякьнаан йикьрар гъийитIну.

 

«Рякъ рас апIуз харж гъапIу дакьатарин асас пай – сач райондин бюджетдиз транспортдин налог уч апIбиинди гъафи дакьатар ву.

 

Къайд апIуз ккундузузки, Дагъустан Республикайин Правительствойин йикьрариинди муниципалитетари уч гъапIу транспортдин налог, районарин рякъяр рас апIбан бадали, субсидйир жюрейиинди кьяляхъ тувра. Гьадму пулин дакьатар райондиз кьяляхъ гъюбаз лигну, гьаму йисан эвелиан мина райондин швнуб-саб гъулаъ рякъяр рас апIуз мумкинвал гъабхьну. Гьамусдихъан тинара му ляхин давам апIидича»,

 

– гъапну Мягьямед Къурбановди.

 

Чан улхуб давам апIури, райондин главайи мялум гъапIганси, ТIивак гъулан кючейин рякъ рас апIбан серенжемар апрелин вазлихъан «НЭМА» ООО тешкилатди давам апIуз хъюгъну. Кьялан кюче ктарди, гьаддихьна гъюрайи кючйириинра асфальт улубзну. Гьисаб гъапIиш, ТIивак гъулаъ 5 километр рякъяриин асфальт улубзна.

 

«Гьамциб хайирлу ляхниъ иштирак гъахьи вари касариз чухсагъул мялум апIураза. «Табасаранское ДЭП №33» ФО-йин кIулиъ айи Эсед Аьбдуллаевдиз ва рякъ рас апIбак хайлин пай киву дилаварчи кас, ТIивак гъулан агьали Гьяжимурад Гьяжиевдиз аьхю вуйи чухсагъул пуз ккундузуз»,

– аьлава гъапIну Мягьямед Къурбановди.