15-пи июлиъ Дагъустан Республикайин экономикайинна аьтрафарин артмиш’валин министр Гьяжи Султанов республикайин журналистарихъди гюрюшмиш гъахьну. СМИ-йин вакиларихъди гюрюш тешкил апIбан асас себеб — гьамусяаьт республикайиъ уьмриз кечирмиш апIурайи «Дагъустан Республикайин дагълу терефарин яшайишдинна экономикайин армиш’вал» гьюкуматдин программайин гьякьнаан республикайин агьалйириз  мялуматар тувувал вуйи.

 

Конференция ачмиш апIури, министри къайд гъапIганси, ихь региондиъ дагълу терефарси гьисаб апIурайи, гьюлихьан 500 метртIан ягълишнаъди ерлешмиш духьнайи 1 агъзуртIан артухъ гъулар ва 30 муниципалитетар а.

«Мялум вуйиганси, республикайиъ «Дагъустан Республикайин дагълу терефарин гьякьнаан» къанун кьабул дапIна. Республикайин Главайин тIалабниинди, сач 2024-пи йисазкьан вуйи цIийи программа тартиб гъапIунча. Натижайиъ тартиб ва тасдикь гъапIу программайин серенжемар экономика артмиш апIбан кIул’инди вуйи цирклариз улупна, ва къайд апIуз ккундузузки, му программа сабпи нубатнаъди бицIи гьясилдрариз кюмек апIурайиб ву»,

— къайд гъапIну министри.

 

Журналистарихъди вуйи гюрюшдиъ Гьяжи Султановди мялум гъапIганси, программа уьмриз кечирмиш апIбан бадали, республикайин бюджетдиан 70 миллион манат жара дапIна. Программайиъ улупнайи кIул’инди вуйи цирклариз харж гъапIу дакьатарикан 50%-дихьна субсидйир жюрейиинди кьяляхъ тувра.

 

«Программайиъ иштирак хьуз ккунидарихьан аьрзйир августдихъан кьабул апIуз хъюгъди. Гъубшу йисанра  му программайиъ иштирак хьуз 24 касдихьан аьрзйир гъафнийи. Натижайиъ 24 касдигъян программайин гъалибчйирди 3 кас гъядягънийи. Думуган бюджетдиан жара дапIнайиб 65,5 миллион манат вуйи»,

– давам гъапIнийи Гьяжи Султановди.

 

Конференцияйиъ министри республикайин экомика артмиш апIбан бадали уьмриз кечирмиш апIурайи жара проектариканра мялум гъапIнийи. Дугъан гафариинди, гьамусяаьт Дагъустандиъ 100-тIан артухъ объектариин тикилишчивалин ляхнар давам шула.

 

Мидланра гъайри, дугъу «100 мектеб» ва «Ерли жягьтлувар» проектарин гьякьнаанра  мялуматар тувнийи.

 

«Мисал вуди «100 мектеб» проект гъадабгъиш, 2018-2019-пи йисари му проектдин дахилнаъди республикайин дагълу терефариъ айи 139 мектеб рас гъапIну. Проект давам апIури, ццира дидиъ иштирак хьуз ккуни мектебариан 300-тIан артухъ аьрзйир гъафну. Натижайиъ дагълу терефариъ ерлешмиш духьнайи 76 мектеб гъядягъну. Гьадму гьисабнаан варитIан гизаф мектебар (18 мектеб) Табасаран райондиндар ву.

 

Хъа «Ерли жягьтлувалар» проектдикан улхуруш, сач му проектдин дахилнаъди 49 проект уьмриз кечирмиш гъапIну. Мушваъра кIубанди жягьтлувал улупурайиб Табасаран район ву», — аьлава гъапIну министри.