ЕГЭ-2020 имтигьнарин кампания давам шула. Выпускникари гьацIартIан артухъ имтигьнар тувну, ва багарихьди сабпи имтигьнарин натижйирра ашкар хьиди. Июлин 13-пи йигъан физикайин ва тарихдин дарсариан ЕГЭ гъабхьну. Дидиъ республикайин 3239 выпускник иштирак гъахьнийи.
Гьюкуматдин аттестация къайдайиъди гъабхури гъахьнушра, бицIи-бицIи нукьсанвалар арайиз хрударра айи. РД-йин Минобразованиейин пресс-гъуллугънан мялуматариинди, шпаргалкйир ва телефонар ишлетмиш апIурайи 6 кас имтигьяндиан утIуккну.
Имтигьян ГЭК-дин вакиларин, федералин экспертарин ва жямяаьтлугъ касарин гюзчиваликкди гъубхну.
«ЕГЭ гъабхбан къайда гюзчиваликк уьбхюз удучIвури, гъябгъюрайи йисан хьубпи раж вуйиз. Имтигьнар къайда чIур дарапIди гъахурайиваликан умудлуди пуз шулзухьан. 13-пи июлиъ Хазарин СОШ-дин бинайиинди тешкил дапIнайи 133-пи пунктдиъ физикайин ва тарихдин дарсариан ЕГЭ гъабхувал гюзчиваликк уьбхюрайза. Узу гъахьи пунктарикан гьаму пункт варитIан ужуди албагнайиб вуйи. Имтигьнар Роспотребнадзори улупнайи къайдайиинди тешкил гъапIнийи. ППЭ-йин кIулиъ айирин мюгькамди албагнайи командайин, тешкилатчйирин, ГЭК-дин вакиларин, федералин экспертарин, Рособрнадзорин гъуллугъчйирин ва гьацира жямяаьтлугъдин арайиан вуйи касарин гюзчиваликкди имтигьян лазим вуйи къайдайиинди, дугъриди ва ачухъди гъабхуз мумкинвал гъабхьну»,
– гъапну федералин жямяаьтлугъ вакил Вероника Захарьяевайи.
Физикайин ва тарихдин дарсариан имтигьян респуб-ликайин 44 пунктдиъ 3 сяаьтна 55 дакьикьайиъ кIули гъубшну. Вари пунктариъ видеойиан гюзчивал гъабхурайи.
Физикайиан вуйи имтигьяндиъ 32 табшуругъ, хъа тарихдин дарснаан – 25 табшуругъ гьял апIуз тувнайи. Имтигьян тувубси кьабул апIбан бадали, физикайиан асккан гьисаб 36 балл, хъа тарихдин дарснан ЕГЭ-йиан – 32 балл гъадагъну ккундийи. Имтигьяндин натижйир 27-пи июлиъ ашкар апIиди.
Республикайи ЕГЭ лазим вуйи къайдайиъди, саб вуйи расписаниейиинди гъабхура. Гьарсаб имтигьяндин кьяляхъ республикайин образованиейинна илимдин Министерствойи вари муниципалитетарихъди видео-конференция тешкил апIура. Душваъ имтигьян гъабхбан натижйирикан, гъахьи нукьсанваларикан ва багарихьди тамам апIуз улихь диврайи планарикан ктибтуру.
ЕГЭ-2020 имтигьнар тувбан асас вахт 25-пи июлиъ ккудубкIура. Гъябгъюрайи йисан имтигьнар тувбаъ саки 10 агъзуртIан артухъ выпускникар иштирак хьибди.
