Июлин 15-пи йигъан РД-йин аьтрафариин коронавирусдин цIийи инфекция тарабгъувалихъди аькси женг гъабхру Оператив штабдиъ кIули гъубшу заседаниейиъ мялум гъабхьиганси, Дагъустан Республика коронавирус тарабгъувал дебккуз ижми дапIнайи уьлчмйир алдагъбан кьюбпи этапдиина улдубчIвну ва шубубпи этапдихьна гьязур шула.
Гьаму йигъари 800 кв. метртIан артухъ йишв адру ариш-веришдин туканар, ачухъ айвнар ккайи кафйир ва ресторанар, образование-йин бязи идарйир ва диндин тешкилатар лихуз хъюгъди.
Заседаниейиъ РД-йин Глава Владимир Васильевди къайд гъапIганси, республикайин спортсменар талитарихьна гьязур хьпаз кюмек вуди, ахтармиш апIбан проектариин биналамиш духьну, хьуб спортзал арццуз мумкинвал а.
РД-йиъ айи Роспотребнад-зорин Управлениейин кIулиъ айи Николай Павловди чан удучIвну улхбаъ республикайиъ коронавирусдихъди аьлакьалу санитарияйинна эпидемиологияйин аьгьвалат къайдайиз гъюрайиваликан мялум гъапIну. Дугъан гафариинди, коронавирусдин инфекцияйиан аьзарлу духьнайидарин кьадар рябкъюри-рябкъюри ис шула.
Дагъустандин Глава мектебдиз улихьна вуйи идарйир ахтармиш апIбаъ учIру месэлйир арайиз дуфнайивалиин дийигънийи. Мидланра гъайри, Владимир Васильевди республикайиз харижи уьлкйириан гъюрайидарик COVID-19 инфекция каш ахтармиш апIру тестирование гъабхбаз дикъатлу фикир тувну ккуниваликанра гъапнийи.
Заседаниейиъ туриствалин циркил гьяракатнаъ ипну ккунивалин месэла за гъапIнийи. РД-йин туризмдин ва НХП-йин министр Расул Ибрагьимовдин гафариинди, республикайин туризмдин хайлин комплексарин вакилар, коронавирусдихъди аьлакьалуди ижми дапIнайи уьлчмйир алдагъуб ва ахтармиш апIбан проектарин дахилнаъди туриствалин саб кьадар базйир гьяракатнаъ ирчуб ккун апIури, илтIикIура.
Гьюлин гъирагъарихъ рягьятвал гъадабгъуз ккуни ватандашарин кьадар йигълан-йигъаз артухъ шулайивал гьисабназ гъадабгъну, Избербаш шагьрин глава Мягьямед Исакьовра ахтармиш апIбан проектарин дахилнаъди саб бязи гостиницйир арццбан тIалаб хьади Оператив штабдин комиссияйиз илтIикIну.
Владимир Васильевди, илтIикIу касарин жягьтлуваларин тереф уьбхюри, арайиз дуфнайи суалар гюзчивал гъабхру комиссияйин органарин вакиларихъди сатIиди гьял апIуз табшуругъ тувну.
